صلاح جاهين وقف الشريط فى وضع ثابت
وقف الشريط فى وضع ثابت
دلوقتى نقدر نفحص المنظر
مفيش ولا تفصيلة غابت
وكل شئ بيقول وبيعبر
من غير كلام ولا صوت
أول ما ضغط الموت
على زر فى الملكوت
بخفة وبجبروت فى يوم أغبر
وقف الشريط في وضع ثابت
دلوقت نقدر نفحص المنظر
أنظر تلاقى الراية منشورةْ
متمزعة لكن ما زالت فوق
بتصارع الريح اللى مسعورةْ
وانظر تلاقى البلاد
أجيال ورا أجيال
رافعها باستبسال
ونزيف دما سيال على الجبهة
وفـْ عنفوان النضال
وقف الشريط في وضع ثابت
خلى المكنجى يرجع المشهد
عايز أشوف نفسى زمان وانا شب
داخل فى رهط الثورة وانا غضبان
ومش عاجبنى جن أو انسان
قال المكنجى : رجوع مفيش
عيش طول ما فيك أنفاس تعيش
بص شوف ..
ركن الشباب فيه ألف مليون شب
ومش عاجبهم لا وصى ولا أب
انظر اليهم وانت تتذكر
ليه ضربة صابت وضربة خابت
وضربة وقفت بالشريط فى وضع ثابت
انظر وشوف ع المهل بالراحة
الشمس وسط القبه قداحة
والقدس واقعة والهرم منداس
صوت الجرس والادان على قلبها حراس
وآدى بطلها هل فى الساحة
قام بالحجر فى الايد بيغلى حماس
قال المكنجى والشريط شغال
ملكش تسأل سؤال
انظر وشوف الحق لما انهان
انظر وشوف الآن
بكره بقى امبارح فى حضن زمان
وبعد بكره فوق همومك فات
مفيش شريط مأجور ولا خوان
ولا شريط له ثبات
ليست هناك تعليقات:
إرسال تعليق