كلام فى الاقتصاد - مجنونة يا حمرا

بعد ان عرفنا مأساة الشيدر نشوف المجنونة يا قوطة 

المحدد الرئيسى للسعر هو قانون العرض والطلب 

بتنتج كام قفص طماطم وتعرضهم للبيع والسوق محتاج كام قفص 

نفرض ان الفلاح عرض للبيع 20 قفص طماطم نقول 500 كجم بسعر 2 جنيه للكيلو ولما وصلوا السوق تم عرضهم والناس اقبلت للشراء فلاحظ البائع ان الناس كتير حوالى 200 فرد وكل واحد بيشترى 1.5 كجم فى المتوسط  ومصانع الصاصة محتاجة 100 كجم يوميا يعنى المطلوب كله 400 كيلو ... على اخر النهار يلاقى عنده 100 كجم متبقى غير مباع فيغير التسعيرة يخليها 1.75 جنيها علشان يبيع اللى فاضل ويلم فرشته ويروح هنا العرض اكتر من الطلب مش كل الناس عايزة طماطم فالسعر ينزل لان الانتاج فايض 

أو انه يحاول لعبة التصدير لتصدير الفائض وقع تحت ايده كام مواطن ليبى فعرض عليهم الطماطم المصرى الممتازة وانهم لو اشتروها وباعوها فى ليبيا حياكلوا من وراها الشهد ولو كان أمين حيبيع الكمية الباقية 100 كيلو بسعر البيع العادى 2ج للكيلو بدون خسائر وكده الدنيا وازنت نفسها 

افترضنا ان الطبيعى اصبح 2 كجم استهلاك يومى للأسرة من الطماطم وطلب السكان على الطماطم ثابت وعدد السكان ثابت يبقى بعرض كل يوم 500 كيلو .. 400 للطلب المحلى  و100 كيلو تصدير 

حصل تغيير على الوضع الطبيعى الجماعة الليبين لقوا نفسهم تربحوا بشكل كبير من الطماطم نتيجة للظروف السياسية والاقتصادية الهباب فى ليبيا فجالك وقالك انا عايز 300 كيلو مش 100 كيلو وبأى سعر فحضرتك قلتله طيب حبيعلك الكيلو ب 3 جنيه قالك موافق 

تانى يوم حضرتك جالك 500 ك مطلوب 400 للطلب المحلى و300 للتصدير .. بعت 300 للتصدير بسعر 3 ج للكيلو وتبقى عندك 200 كيلو فقط للطلب المحلى يعنى نصف المطلوب بسعر 2 جنيه 

الناس يا عينى مزحومة على الطماطم وشايفين انها مش حتكفيهم كلهم بسعر 2 جنيه وحصل اللى حصل ومش كله اتراضى 

تانى يوم نفس الحكاية لكن فيه ناس جايين مستقتلين على الطماطم ولو ب 2.5 ولما التاجر سمع الكلمة زقطط ورفع السعر ل2.5 ج واللى مش عاجبه يرحل لان المستهلك مستعد يدفع 2.5 ج مقابل انه ياخدها واستقر السعر على 2.5 ج وبدأت الناس تقلل استهلاكها من الطماطم وزيادة استهلاكها من الصلصة لتعويض النقص فى الطلب

التاجر لما بيروح كل يوم بالنسبة له الدنيا متظبطة لكن ابليس مش سايبه فى حالة .... جزمة الليبى انظف من دماغ المصرى بيدفعلك 3 جنيه فى الكيلو والمصرى بيدفع 2.5 ج ومش عاجبه العدل ايا شيخ بندر التجار انك توحد السعر كله لـ 3 جنيه جوا وبرا .. ده صاحب بالين كداب يا عم الحاج وانت وعيالك اولى بالفرق 

طول الليل والتاجر بيفكر فى موضوع توحيد السعر بره وجوه 

ولغاية ما التاجر يقرر ممكن نقول لنفسنا الموضوع بسيط نزود انتاج الطماطم ليصبح 700 كيلو علشان كل ده يتلغى بتساوى الطلب الداخلى والخارجى عند 700 كيلو عند السعر الطبيعى 2 جنيه للكيلو 

لأ شاطر يا باشا ياللى بتفكر .. هو الفلاح حيضرب ايده فى الرمل يطلع طماطم 

الفلاح لازم يعمل حسابه يشترى فدان زيادة ويجيب بذور وعمالة ويشتغل ليرفع الانتاج من 500 الى 700 كيلو يوميا وعليك بخير ده حيكون الموسم الجاى يعنى من 6 شهور الى سنة 

يعنى يظل الوضع على حاله وعلى المتضرر اللجوء الى الصلصة السلعة البديلة 

نخش على مصنع الصلصة اللى بيبيع برطمان الصلصة ب 5 جنيه عند سعر 2 جنيه لكيلو الطمام ... طبعا المصنع عنده مخزون انتاج وفى لحظة بدأ المخزون يقل لان الطماطم سعرها ارتفع الى 2.5 واستهلاك الناس من الصاصة زاد 

وفى كل الاحوال لازم المصنع يستمر فى انتاج الصلصة فلما جه يشترى طماطم لقاها 2.5 جنيه للكيلو مش بـ 2 جنيه وفى نفس الوقت لازم يزود انتاجه عن الطبيعى لان الطلب على الصلصة زاد فيدخل السوق يشترى ب 2.5 جنيه وبدل ما كان بيشترى 100 كيلو يوميا دلوقتى عايز 200 كيلو يوميا 

فالطلب على الطماطم زاد بدل ال700 كيلو بقوا 800 كيلو يوميا والحكاية باظت خالص

طبعا انتاج الصلصة الجديدة البرطمان مش ب 5 جنيه نقول مثلا 7 جنيه فالراجل المستهلك خلاص حيكفر ويطلع من هدومه الطماطم غلت والصلصة غلت فيقوم يهج من البلد وده عين ما تريده السلطة السياسية للبلاد ان الشعب يخف دول 100 مليون يا حاج 

تاجر الطماطم لقى الدنيا اخر حلاوة مطلوب طماطم فى كل حتة وجاله الليبى يشترى ب 3 ج قاله حاسب يا شقيق ... الاخوة فى دبى سمعوا عن حلاوة الطماطم المصرى وعايزين يدفعوا 5 جنيه للكيلو .. يا خراشى 
تنتهى الحكاية ان التاجر يقول للكل يلا يا ولاد الوزة الطماطم ب 5 جنيه واللى مش عاجبه تبقى حمرا
ويصبح سعر الطماطم 5 جنيه عند انتاج 500 كيلو يوميا 
كل ده والدنيا زى ما هى لا انتاج زاد ولا سعر صرف العملة اتغير كله فى الثبات 
وتخيل سعادتك على الوضع ده ومحصول الطماطم اتحرق من موجة حارة او موجة بارده والانتاج وصل الى 400 او 300 او 200 او 100 كيلو يوميا اكيد سعر الطماطم حيوصل 10 جنيه وده حصل وسيظل يحصل عندنا فى مصر 

ولنا عودة مرة اخرى مع الطماطم لانه متبقى افتراضات لا نهائية أهمها

1. ايه اللى بيحصل لما العرض يزيد نتيجة منع التصدير 
2. ايه اللى بيحصل مع تغير سعر الصرف 
3. ايه اللى بيحصل لما عدد السكان يزيد
4. ايه اللى بيحصل فى موسم الزراعة القادم مع الرغبة فى زيادة الانتاج 
5. ايه اللى بيحصل لما الدولة بتكون نايمة على ودانها وكل ده بيحصل من حواليها 

وعلى رأى حكيم الغير حكيم

وايه اللى بيحصل ده .. ايه اللى انا شايفه ده 

لبيك يا سرى

 الحلاج

لبّيكَ لبّيكَ يا سرّي و نجوائـــي لبّيك لبّيك يا قصدي و معنائـي

أدعوك بلْ أنت تدعوني إليك فهـلْ ناديتُ إيّاك أم ناجيتَ إيّائـــي

يا عين عين وجودي يا مدى هممي يا منطقي و عباراتي و إيمائـي

يا كلّ كلّي يا سمعي و يا بصري يا جملتي و تباعيضي و أجزائي

يا كلّ كـلّي و كلّ الكـلّ ملتبس و كل كـلّك ملبوس بمعنائــي

يا من به عُلقَتْ روحي فقد تلفت وجدا فصرتَ رهينا تحت أهوائي

أبكي على شجني من فرقتي وطني طوعاً و يسعدني بالنوح أعدائـي

أدنو فيبعدني خوف فيقلقنــي شوق تمكّن في مكنون أحشائـي

فكيف أصنع في حبّ كَلِفْتُ به مولاي قد ملّ من سقمي أطبّائـي

قالوا تداوَ به منه فقلت لهـم يا قوم هل يتداوى الداء بالدائـي

حبّي لمولاي أضناني و أسقمني فكيف أشكو إلى مولاي مولائـي

اّني لأرمقه و القلب يعرفـه فما يترجم عنه غير ايمائـــي

يا ويحَ روحي من روحي فوا أسفي عليَّ منّي فإنّي اصل بلوائـــي

كانّني غَرق تبدو أناملــه تَغوثُّاً و هو في بحر من المـاء

وليس يَعْلَم ما لاقيت من احدٍ إلا الذي حلَّ منّي في سويدائـي

ذاك العليم بما لاقيت من دنفٍ و في مشيئِتِه موتي و إحيائــي

يا غاية السؤل و المأمول يا سكني يا عيش روحي يا ديني و دنيائي

قُلْ لي فَدَيْتُكَ يا سمعي و يا بصري لِمْ ذا اللجاجة في بُعدي و إقصائي

إِن كنتَ بالغيب عن عينيَّ مُحْتَجِباً فالقلب يرعاك في الأبعاد و النائي

كلام فى الاقتصاد - الشيدر الطازة

الحمد لله 

هكذا اعتاد المصريون الرد حين تسألهم عن حالهم 

لما يكون النظام السياسى الحاكم للبلد بيطبق سياسة اقتصادية توسعية فى الانفاق والدنيا تبشبش على الناس فتسأله يقولك تمام التمام والحمد لله .. ولما يتبنى النظام السياسى سياسة اقتصادية انكماشية والحالة تقف وال chicken wings تعدى ال 20 جنيه والفرخة البيضة الحكيانة توصل 60 أو 70 جنيه تسأل المواطن يقولك الحمد لله 

فى كتاب الفوائد لابن القيم لا انسى عدة مقولات أهمها : 

الجاهل يشكو من يرحمه الى من لا يرحمه والعاقل يشكو من لا يرحمه الى من يرحمه 

يعنى تسأل فلان يقولك العيشة هباب جالى مرض والعيال ضعفانين ومش لاقيين ناكل وكأنه من غير قصد يشكو الله الرحيم (الفاعل) الى غيره من البشر واللى طبعهم مبيرحمش 

لكن العاقل اذا سألته حمد الله وفى خلوته بربه يشكو فعل الناس معه فيشكو البشر (من لا يرحمه) الى الله (من يرحمه) 

فتبارك الله رب العالمين 

فى العبارة السابقة كتبت الله الرحيم (الفاعل) وهذا ليس اعتقادى بل هذا اعتقاد الشاكى فالله ليس بظلام للعبيد ومش ربنا هو اللى ضيق رزقك ولا جابلك المرض .. الحقيقة مش كده والمواضيع مختلفة تماما عما علمونا اياه فى المدارس والمساجد والتلفزة 

والفاعل الأصلى هو الفاعل الاقتصادى المتحكم فى الاقتصاد فهو الفاعل الرئيسى مع مجموعة عوامل مساعدة 

الأصل ان الذى يطبق سياسة اقتصادية هى الحكومة ... لكن فى مصر اللى بيفتكس سياسة اقتصادية هو رئيس الدولة 

عايزها قطاع عام واشتراكية .. حاضر يا فندم .. عايزها رأسمالية ... حاضر يا فندم ... عايزها ملوخية بالتقلية .. موجود يا فندم 

ودى طبيعة حكم الفرد فى الدول الشمولية الرئيس بيمشى المركب زى ما هو عايز 

فى بداية القرن الواحد والعشرين ظهرت منظومة جديدة للاسماء الحسنى وبرضه 99 اسم مع حذف اسماء قديمة واضافة اسماء وتوصف القائمة الجديدة بأنها كلها لا تخرج عما هو مذكور فى القران والسنة وهناك اسم يستوقفنى فيها وهو اسم المسعر 

1-  عن أنس بن مالك رضي الله عنه أنه قال غلا السعر على عهد رسول الله صلى الله عليه وسلم فقالوا يا رسول الله قد غلا السعر فسعِّر لنا فقال: (إن الله هو المسعر القابض الباسط الرازق، إني لأرجو أن ألقى ربي وليس أحد يطلبني بمظلمة في دم ولا مال) رواه أحمد وغيره.

2- عن ابي هريرة رضي الله عنه أن رجلا جاء فقال يا رسول الله سَعِّر فقال بل أدعو ثم جاءه رجل فقال يا رسول الله سعر فقال بل الله يخفض ويرفع وإني لأرجو أن ألقى الله      وليس لأحد عندي مظلمة) رواه أبو داود.

الحديثين خارج البخارى ومسلم ومش معنى انهم خارج البخارى ومسلم انهم من الموضوعات او الضعاف وطبعا مشايخنا بارك الله فيهم وعليهم يتوسعون فى الشروحات لينسبون الغلاء الى الفعل الالهى .. وكأن الله بيضيق على الناس 

وده الحل الاسلامى للمشكلة الاقتصادية 

فيه ناس كتيرة مش عارفة وبتسأل عن علاقة الدولار بالطماطم أو بالجبنة الفلاحى والمش فهى منتجات محلية وليس لها علاقة بالدولار ..... صحيح 

طبيعى انى لما اشترى جبنة شيدر مستورد فانا بشترى بالدولار اللى هو السعر العالمى .. فيتم نسبة الدولار الى العملة المحلية فادفع بالجنيه بدلا من الدولار ولكن بالسعر الدولارى 

كيلو الشيدر للمستهلك مسعر مثلا ب 10 دولار وبشتريه من بلاده ب 8 دولار والفرق عبارة عن تكاليف استيراد ونقل وتخزين وربح نقول دولار تكاليف ودولار ربح .. تمام والدولار = 8 جنيه يبقى المستورد بيجمع 64 جنيه مصرى يحولها الى 8 دولار ويدفعها للمنتج الاوربى ويصرف 8 جنيه نقل وتخزين وتأمين وتوزيع ويكسب 8 جنيه حلال بلالا 

والمستهلك انا وانت يشترى الكيلو ب 80 جنيه 

هوبا متعرفش ليه رئيس الدولة أو الحكومة رفعت سعر الدولار مقابل الجنيه فبلا من 1:8 اصبح 1:16 الضعف ومرة نبقى نقول ليه وامتى المفروض يعمل كده ويحرك سعر الصرف

تعالى نحسبها من جديد على السعر الجديد مع افتراض ثبات باقى المتغيرات يعنى السعر العالمى والمصاريف 

المستورد بيجمع 8*16 = 128 جنيه علشان يدفعها للمنتج الاوربى وبيصرف دولار = 16 جنيه ويفترض انه يكسب 8 جنيه يبقى سعر الكيلو العادل للجبن الشيدر = 152 جنيه فى السوق المصرى بدلا من 80 جنيه يعنة اصبح السعر فيه زيادة 90% لكن حتى ده مبيحصلش اللى بيحصل ان السعر وصل كحد ادنى ليكون 160 جنيه وده لان المستورد اللى كان بيكسب 8 جنيه قالك لأ السعر العالمى للبيع للمستهلك 10 دولار يبقى انا اكسب دولار كامل بحاله علبى السعر الجديد فيرفع مكسبه من 8 الى 16 جنيه ليصل السعر الى 160 جنيه 

يبقى الاصل انه فيه محدد للسعر وهو سعر تبادل العملات ويظهر محددات اخرى جديدة واساسها هو الجشع فالمستورد بيحقق ارباحه على حسابك بالدولار ويضاعف ربحه ومفيش دولة بتقوله انت رايح فين 

بيحاسبك بالسعر العالمى للبيع مع ان جزء من تكاليفه لا يدفعها بالسعر العالمى 

يعنى عنده عامل بيقبض 2000 جنيه فى الشهر وايجار ثلاجات 10000 جنيه شهريا ونقل محلى وتخزين وتوزيع 20000 جنيه شهريا بمجموع 32000 جنيه بالشهر يعنى بتكلف ما يساوى 4000 دولار على السعر القديم 

ولما ارتفع الدولار الى الضعف هو لسه بيدفع 32000 جنيه لكن فى حساباته يقولك 4000 دولا * 16 ج السعر الجديد = 64000جنيه يبقى هو كسب هنا الفرق 32000 جنيه زيادة لانه لم يزل بيدفع بالجنيه ونفس المبلغ لكن حقق وفر زيادة فى كل الطلبية يعادل 32000 جنيه بخلاف فرق الربح اللى اتكلمنا عنه ان هامش ربحه ارتفع بنفس نسبة الزيادة فى سعر العملة 

ده جشع ويمكن التعليق عليه بكلمة واحدة 

انت بتبعلى الجبنة الشيدر بالسعر العالمى ومش بتقبضنى وانا شغال عندك بالسعر العالمى ... وده قمة الظلم الاقتصادى والفساد الرأسمالى 

ونستكمل بعدين مع الطماطم

أمة العظمة 4 - سياسة العزل

انا دلوقتى عندى 50 سنة .. اصابنى الكِبر ولى ذرية ضعفاء 
وانا اكتر واحد قابلته فى حياتى ... طبعا منا عايش معايا !!!! 
أقصد اكتر حد مدمن للأفلام الأجنبى وفعلا : الأكشن مليش فيه 
الرعب والخيال العلمى والتاريخى والحربى 
وطبيعى انه على مدار الزمن واحد بدماغه البايظة دى انه عنده يوتوبيا متغيرة متبدلة بتغير المفاهيم 
وناس حبايبى كتير كلمتهم عن مفهوم العزل كحل وعلاج للمجتمع المصرى مع انى عارف انه حل غير انسانى بالمرة لكن تصورى عنه انه حماية لمستقبل علشان نكون انسان سليم ذهنيا وبدنيا ومعرفيا
سياسة العزل ومفهومها موجود فى افلام اجنبية كتير وبصور مختلفة أقدمها جماعات دينية بتعزل مريديها فى مناطق نائية .. وده اتكرر كتير وموجود فى الواقع لكن ده عزل اختيارى وفى حالات كتير بيصحبه كذب وخداع وتدليس للسيطرة على العقول وموجود منه فى مجتمعنا حالات فردية أشبه بحالات المتصوفة ومفهوم بعضهم المغلوط عن العزلة 
وانا عن نفسى حاولت طول عمرى اعيش فى عزلة واتمنى انى انجح مستمر فى العزلة ما تبقى لى من أيام العمر 

لكن اقصد نوع تانى من العزلة ... عزلة افلام الخيال العلمى وهى عزلة سياسية محلية فليست حالة عامة فى كل الدول ولكنها تنطبق على حالة دولة واحدة .. تقترب من ولكنها ليست التمييز العنصرى فهى لسيت ابارتهايد 
مجموعة من الشعب شافوا ان الحالة بزرميط فاختاروا الحياة النظيفة التى تقام على احترام وسيادة القانون وبيئة صحية وتعليمات ومنهج حياة معين فانعزلوا داخل مدينة وبنوا حولها الاسوار وتركوا الهباشين والنباشين ومحترفى الاجرام خارج الأسوار 
فالدولة هى المدينة وما خارجها مجتمع غير معترف به ما هو الا مجموعة من الغوغاء لا حق لهم الا ان يغوروا فى ستين داهية 
.......................
احد مشاكلنا النفسية العميقة والمتأصلة فينا هى عظمة التقدير الذاتى .. اننا بنعظم نفسنا أوى أوى أوى ... وانا ومن بعد منى الطوفان .. وان جالك الطوفان حط ولدك بين رجليك ... علشان تقف عليه ويغور هو وتعيش انت وهو امر ضد الفطرة السليمة وفى الاثر لو ان الله كان ليرحم أحدا لرحم تلك المرأة فى عهد طوفان نوح اذ غمرها الماء فاصبحت ترفع يديها بطفلها الى الاعلى كلما على الماء حتى غرقت المرأة ولفترة بعدها غرق الطفل بعد سقوط يديها ... تلك هى الفطرة التى هى تضحية وعدم ايثار الذات وسبق وقلت ان احد اهم عيوب المصريين هى انهم عايزين يربوا عيالهم معتقدين ان التربية هى تغذية عملية أكل وشرب وليست عملية تربوية لكل اطياف المجتمع ... المجتمع بقيمه وثقافته وأطُره هو بيئة الطفل وليس البيت فقط .. انه بيت وشارع ومدرسة ومؤسسة حكومية وطابور عيش وشعبطة مواصلات .. كل ده واكتر لازم يتصلح طالما عايز تربى عيالك 
المجتمع كله لازم يتربى من جديد علشان كل طفل يقدر يعيش طفولته ويصبح فرد صالح فى مجتمعه
انت ممكن تسيطر فى البيت على بيئة المنزل اللى الطفل عايش فيها وتعلمه السلوك وايه آه وايه لأ 
لكن الطفل فى المدرسة وضع المدرش مختلف .. المدرس بيطرش (عفوا) الكلمتين ع السبورة والموضوع انتهى ومش فاضى يهاتى مع 60 عيل ... اما لما الطفل بينزل الشارع فخراب ما بعده خراب الفاظ وعراك وزبالة وكعبلة مواصلات ومحل مساحته 4 متر فارش قدامه 40 متر ... وتبقى شاطر لو تعرف تلاقى رصيف فاضى تمشى عليه فأنت تزاحم السيارات طريقها والسيارات تزاحمك طريقها ... اما طريقك انت اللى هو الرصيف فمشحون بفرش المحلات والقهاوى والباعة الجائلين والمتسولين فوضى ما بعدها فوضى صفيحة زبالة كاملة بنعيش فيها 
فالسيسى وجد الحل قرر بناء مدن جديدة للمترفين والاغنياء يستقلون فيها عن امثالنا واشباهنا من العامة والغوغاء لينعزلون فيها عنا .. هناك ستجد المدارس والمستشفيات وكل حاجة على حق ... واحنا مننا لنفسنا ناكل بعض لغاية ما نخلص على بعض 
موظفون الادارات الحكومية ياكلونا ولا خدمات ولا مرافق ولا يسعدون ولا يحزنون 
هذا مفهوم السيسى عن العزل ... ناس فى قصور مترفين متمتعين مبدأهم امريكى بحت مناهض ومناقض لمبدأ وعقيدة أهل الديانات 
فأهل الديانات السماوية والمسلمون خاصة معتقدهم أن الجنة فى الآخرة .. لكن امريكا دولة مادية جدا بتقولك الجنة فى الارض وفيه فعلا مناطق بالعالم ان تخيلت وصفها ستثق انهم يتعمدون بناء صورة لجنة الاخرة فى الارض 

ولو مسمعتش اسأل مثلا عن حاجة قريبة جدا فى دبى أو الخليج القطرى والسعودى .. ناس بتتحدى خيال الانسان فى بناء الجنة ولو دخلت عقول صاحب الجلالة أو صاحب السمو أو فخامة الزعيم لوجدت عقولهم فعلا ونياتهم مقصود بها تفاخر بنى عك وليس ما يحتاجه شعوب بنى عك فالعقلانية هى اخر ما يراه الانسان فى حياته ويدرك معناها فقط مع نزول ملك الموت لقبض روحه 
احنا فعلا محتاجين عزل مجتمعى لكن مش العزل المالى بتاع السيسى ولا عزل افلام الخيال العلمى الامريكية 
محتاجين عزل مجتمعى معرفى وحياتى ينأى بنا عن زمن الهشك بشك اللى محاصرنا من يوم ولادتنا 

بدأنا فعلا .. النسوان تطبل والرجالة هى اللى بترقص

أمة العظمة 3- ضل راجل ولا ضل حيطه

هانى رمزى الممثل فى فيلم عايز حقى لما قرأ الدستور فهم غلط وكان فيلم جميل انتهى انه فهم انه ملوش ومش حياخد حاجة وان العيب عيب ادارة .. علشان كده عمل فيلم ظاظا ورشح سعيد ظاظا نفسه مجبرا لرئاسة الجمهورية رمز الكوز وشاءت الاقدار ان يصبح رئيسا 
وينتهى الفيلم بطلقة رصاص وان الشعب هو الحامى والدرع 

ظاظا كان حلم اكتر منه فيلم وكان الفيلم ممكن يتم بمستوى وسيناريو افضل ... وهو فيلم جميل جدا وممتع فى الحقيقة 
ظاظا تم انتاجه فى عام 2006 فى عهد اول مخلوع 
بعدها ظهر علينا محمد حسين طنطاوى بصفته كبير المجلس العسكرى اللى حكم البلد ثم اتى محمد محمد مرسى العياط (رحمه الله) واحد من افظع الحكام اللى حكموا مصر ودخل مع الاخوان فى صراع على السلطة ضد الجيش وراح مرسى وانتهى الأمر بموته وهو فى السجن ثم ظهر عدلى منصور لمدة سنة ومحدش حس بيه ثم جاء خيبة الرجا مؤدب المصريين ومفرق شملهم 
ملاحظة بسيطة محمد حسين طنطاوى وعدلى منصور احياء يرزقون لا فيه رصاصة ولا قهوة بالسم ولا غيره ذلك انهما ليس لهما علاقة بشئ من شئون السياسة فكلاهما كانا واجهة للجيش والجيش بيعرف يحمى تفسه مش لانه بيحمل سلاح بشكل شرعى لكن لانه جيش مصر العظيم يعنى ممنوع الاقتراب او التصوير والف خط احمر .... الا ما عمرى ما سمعت عن خط اخضر مع العلم ان الخط الاخضر اعلى من الخط الازرق والاحمر وهو التوقيع النهائى والاقرار 
احنا فى زمن فوضى وزمن كلام لكن لا زمن الوان ولا ومن افعال فمن حيث اللون .. الالوان اختراع الهى بديع لكن احنا فى كل زمن بنعيش لون واحد فقط يا ازرق لون البروليتاريا فى زمن عبد الناصر واختراع البدله الصيفى يا اسود بعد نكسة 1967 يا احمر بعد ثورة يناير ولم نزل تحت تأثير اللون الأحمر 
لكن زمن فيه الوان بديعة منفردة او متداخلة أو متراكبة مفيش ... كآبة ما بعدها كآبة 

حياتنا مفيهاش ربيع .. الربيع شفناه مع سعاد حسنى فى الدنيا ربيع وعن عن اسمين ربيع .. الربيع العربى وربيع ياسين 

محمد حسين طنطاوى مع انه ممشاش جنب الحيط وعدلى منصور مع انه مشى جنب الحيط ... وكلاهما حى يرزق 
لكن محمد محمد مرسى تسلق الحيط ومشى فوق الحيط والحيط مستحملهمش لان عددهم كاخوان كان كتير ووزنهم فوق الاحتمال 
السيسى كان من البداية يعلم انه لازم يشيل الحيط لانه دائم الادعاء بأنه بينى دولة جديدة فأراد التخلص من الحيط القديم واستبداله بحيط جديد .. والحيط هو الشعب يا ناس 
وزمان قلنا مطلوب دكر لان مثل الست الخايبة ضل راجل ولا ضل حيطه 

أمة العظمة 2- فهلوة التسول

الواقع يشير الى الممثل هانى رمزى .. السينما صورة معبرة عن ثقافة المجتمع وأحد الأدوات الفعالة فى توثيق كافة الأحداث المجتمعية 
فمن خلال فيلم ممكن تعرف أول البوم اصدره محمد فؤاد .. او فترة صود مطرب من خلال الأغنية اللى شغاله فى مشهد القهوة فى فيلم .. ومن خلال الفيلم ممكن تعرف زمن مين من الرقاصات ايامها بدءا من نعيمة عاكف لغاية صافينار ومن اتى بعدها 
لكن متقدرش تعرف مين رئيس جامعة القاهرة أو مين من مصر اللى أخد نوبل 
السينما كتأريخ لثقافة المجتمع واتجاهاته ولهجاته 
لكن السينما لم تكن يوما صادقة فى كل ما تعرضه أو فر طريقة افرازها لناتج نهائى أصيل معبر كل التعبير عن البلد واحوالها واللى فيها 
لكن فيه فيلم ليس كأى فيلم .. اظنه فيلم تليفزيونى بطولة صلاح السعدنى والجميل انه موجود على اليوتيوب اسمه المراكبى يلخص حياة مواطن صياد ساذج جدا وبسيط جدا عاش حياته كلها فى مركبه فى النيل ولم يخرج يوما الى الأسفلت (الحياة) ويوم ما خرج خرجت امعاؤه من دماغه لكنه فى النهاية رجع سليم ... مواطن كما وصفه السيد الوزير بأنه مواطن عشوائى 

ودراسة على الواقع هل فيه امثال المراكبى من السذاجة والبساطة ؟؟؟   نعم عدد قليل جدا 
ودراسة على الواقع هل فيه فى مصر ما يمكن أن نطلق عليه المواطن العشوائى ؟؟؟ ملايين يا باشا 
وعشوائية تلك الملايين لا سذاجة فيها ولا بساطة بل هى شيطنة ابليس اللعين 
تدنى مطلق فى ابجديات اللغة .. حذف كامل للحروف والمعانى واستباط عبارات تفيد معنى ولا علاقة لها باللغة 
الألفاظ التى كنا نعتبرها يوما الفاظا سوقية ... عفوا تخطينا مرحلة الألفاظ السوقية إلى الألفاظ القبيحة ... عفوا تخطينا كل المراحل وصولا الى الألفاظ المستحيلة التى لم يكن متصور يوما ان تصبح سائدة حتى داخل ميكروباص 
المصريين معروفين بخفة دمهم ... مين قال كده ؟؟؟ 
مش خفة دم يا باشا دى قلة أدب 
البلد كلها مهندسين محدش بيعمل حاجة كل واحد شايف نفسه هندزة والباقى عُمال من حواليه فيوجههم اعمل دى وانت اعمل دى كده وده كده ... وخد من ده وده كل واحد مهندز ودكتره وتعليقاته الساخرة على كل شئ حوله هى الشئ الملاحظ عليه .. لكن مبيعملش حاجة ... يوم ما تتكلم مع حد وتقوله حديث رسول الله صلى الله عليه وسلم (داوو مرضاكم بالصدقة) يقولك منا بطلع صدقات .. وتشدد عليه بتطلع فين يقولك : الشحات اللى بقابله فى الشارع وتشدد عليه طلعت كام يقولك رضيته اقوله جنيه او اثنين أو حتى خمسة .. هو الجنيه أو الخمسة هى دى الصدقات اللى بتطلعها 

فزلكة وعجرفة وكبر وكبرياء اصحاب العظمة جموع الشعب المصرى الغير عظيم اللى على أد نيته ربنا أعطاه اللى يستاهله ولسه حنشوف بلاوى وسنهلك وفينا الصالحون 
شحاتين مصر ومتسوليها هم قطاع ليس قليل فى المجتمع تقديرات تقول 3 مليون متسول .. والتسول يا جماعة فى مصر وظيفة وممارسة لجهد اسمه الف والدوران ومد الايد مقابل أجر غير معلوم ولكنه أجر وفير 
انا عن نفسى شهدت متسول عجوز فى السبعينيات من عمره منذ سنوات قليلة وطلب منى اجمعله فلوسه كانوا حوالى 240 جنيه حصيلة الـ shift بتاعه وده ايام ما كان الدولار بـ 6 جنيه 
وقد تغيرت مهنة التسول عبر السنين ... احنا كلنا شفنا فيلم المتسول للزعيم عادل إمام .. فيلم عظيم .. لكن حصل تطور 
دلوقتى ستات عندهم سمنة مفرطة فارشين الطرقات قافلين مداخل الارصفة وانفاق عبور المشاه وغيرها واللى معاها شوية عيال واللى معاها اكياس أكل تجمعها من المحلات .. ويسألون المار ان يعطيهم مما اعطاهم الله لكن بإلحاح مقزز ومحرج جدا 
احنا مش كلنا بنعطى المتسولين بيبقى ليك تقدير للحالة وقيمة المدفوع وتعلم فى سرك ان الصدقة تقع فى يد الرحمن عز وجل وأنها نوع من القرض المدفوع مقدما الى الله الغنى ذو العرش المجيد لكن فى كل مرة قلبك بيحن وتدفع تعرف انه بيضحك عليك وانك مخدوع وتقول لنفسك انا بعامل ربنا .. 
فى هذا الزمن الردئ جدا بأخلاقياته وسلوكه وقيمه قبل فقره الاقتصادى والمعرفى بتلاقى عدد المتسولين بيزيد والكل يقولك مش لاقيين ناكل ولحم صدره مترهل على كرشه ... حس بيا يحس بيك ربنا 

حديثنا ليس عن التسول لكن على الخداع المصرى المسمى فهلوة والتسول أحد تلك الصور الفهلوية 
اذا عددنا مصادر كثيرة جدا سننتهى الى اننا يجب ان ننتهى ويتم التخلص منا فى مزبلة نفايات نووية تهرى لحمنا وتفتت عظمنا 
اقولكم على حاجة احنا فعلا نستحق ما فعله بنا السيسى ونظامه ونكمل بعدين

أمة العظمة

الظاهر ان الناس بتنسى الحقائق لانها كوابيس علشان كده نسبة كبيرة من المصريين يموتون فى تغييب الوعى 
تغييب الوعى الذاتى بالمخدرات والمسكرات وأشباهها 
تغييب وعى الآخرين كحالة الاعلام المصرى الممنهج لتحقيق اهداف حتى تاريخه لا نعرف ماهى فأجندة الاعلام المصرى زى البحر قلاب لا ساحل له ولا مرسى 
وأجمل ما فى المصريين هو انهم عايزين يربوا عيالهم 
هما اصلا متربوش وملقوش حد يربيهم فنفسهم يعوضوا الناقص ويربوا عيالهم 
دايما السادة الزعماء فى كل العالم حينما يلقون خطابا يخاطبون شعوبهم بعبارة : الشعب الـ ...... العظيم 
والنقط دى (....) ممكن تكون المصرى السعودى التونسى الليبى اللبنانى السورى الامريكى الهندى الصينى الفلبينى فالدنيا مفتوحة وكل زعيم من الزعماء ينادى شعبه بأنه الشعب العظيم 
وغنى وديع الصافى : عظيمة يا مصر يا أرض النعم 
مصر قد تكون عظمة يأكلها البوبى (الكلب) وده طبيعى فى تاريخها الكل احتلها ونهش وفتت عظامها 

لكن مصر عظيمة اظن الكلام ده كان ايام الفراعنة ومكنش اسمها مصر ساعتها فالعظمة هى عظمة فرعونية لا عظمة مصرية 
ويمكن سبب كون مصر دولة غير عظيمة ان شعبها وقاطنيها شعب غير عظيم اذا كان رب البيت بالدٌف ضاربٌ فشيمة أهل البيت الرقصُ 

وادلع واجرى يا رمان

.. الشعب المصرى الذى يتحدث اللغة العربية التكتاوية (اللهجة المصرية حاليا) منذ ان اختار اللغة العربية (لغة القران الكريم ) وحاله قبلها وبعدها زبط 

فلم يحكم مصر منذ الدخول العربى أيا من أبناءها الا فى يوليو 1952 م والظاهر والله اعلم ان ابناءها الذين حكموها طلعوا عيال اختها وليسوا من انتاجها فقط أضروها أكثر مما نفعوها واتحداكم تجيبولى واحد عدل عدى وفات أو لسه قاعد ومسيره حيعدى ويفوت راكب قطر توت توت 

 مفيش حد عِدل جاكى يا مصر ... كلهم مصايب من مصايب الزمن وأقصد الحكام الفعليين وليس امثال محمد نجيب فمحمد نجيب رحمه الله شأنه شأن الـ 100 مليون حمار ضحية 
يا عزيزى كلنا حمير .. وطبيعة حياتنا ان اصواتنا عالية جدا ومبدأنا خدوهم بالصوت واشهر ما عند نساءنا الصويت الحيانى 
وكأننا شعب مغضوب عليه أكثر من كوننا من الضالين 
الطبيعى ان نكون كحال الكثير من أمة الاسلام وأمة العرب من الضالين لكن ظروفنا وتضحياتنا علشان نربى عيالنا ونحافظ على استمرار الدورى العام والحفاظ على نجومية محمد رمضان واستمرارية صافينار يجعلنا فعلا وكأننا فعلا من المغضوب عليهم فنحن لم نتورع عن مساعدة نجاتى فى نفخ البلالين علشان عيد الميلاد 
من أمتنا المصرية المغضوب عليها جهابذة بقلوبهم وعقولهم وسمو معتقدهم لكن عددهم كالزبد (الزَبَد مش الزبدة) وسط السيل ،، والسيل عظيم يا بوى وعمال يكبر ويتضخم فمرة يكون سماد سرطانى ومرة يكون بكتريا حمضانة سببت المرض للأرض والحرث والنسل 
نحن فعلا فيروسات كوكب الارض ووجب على الشعوب المتحضرة التخلص منا 
فنحن جميعا ولاد وزه وليس فينا من العظمة والأنفة والمجد شئ أى شئ 
أمة بدلا من أن تعيش حروف اقرأ قلبتها عكسا فعشنا أرقاً 
سيل الفوضى العارم الذى ملأ شوارعنا وبيوتنا ونفوسنا منذ ان تولينا حكم أنفسنا 
نحن لا نجيد حكم أنفسنا ولا نجيد التخطيط للمستقبل ... اننا حتى لا نعرف معنى الحياة الا من خلال تسلم الايادى من خلال رقص ملايين المؤخرات فى الأزقة والشوارع والطرقات وزنجة زنجة حتى الموت 

الشعب العظيم ده هو اللى رقص وجابلنا الرئيس الحالى وهو برضه اللى رقص وجابلنا الاخوان ومن قبلها مبارك ولألف سنة سيرقص كلما جاء رئيس جديد .. هزوا مؤخراتهم فظهر حجمها فحلف الرئيس الحالى انه يخسسكم فجوعكم .. الهى ربنا يورينى فيكم انتوا لسه شفتوا حاجة يا صاحبات المؤخرات السمينة

العلم المصرى

بعد ثورة يناير كان الكلام كتير عن تغيير العلم المصرى وكنت مع اولئك الذين يفضلون التغيير ظاهريا وموضوعويا لكن غلب الجميع رأى مفاده ان العلم المصرى بألوانه الثلاثة شهد انتصارات  حرب اكتوبر ولقطة سعيد صالح وهو بيضع بنقطة دمه النقطة تحت كلمة اكبر فوق العلم

 مش ممكن تتنسى يا استاذ ولا محمد فؤاد وهو بيغنى والله وعملوها الرجالة ورفعوا راس مصر بلدنا فى مباريات الكرة والاعلام المصرية ترفرف 
الواقع انه تم اختزال العلم المصرى فى مشاهد مباريات كرة القدم بوصفها اعمال وطنية معبرة عن تلاحم المصريين وتآلفهم وانضوائهم جميعا تحت راية الحكم الرابع 

الأصل أن الوان العلم بدأت بعد 23 يوليو بالوان ثلاثة رئيسية لم يحدث فيها ظاهريا اى تغيير ولكن الشعار اختلف 
والالوان الثلاثة هى :
الاحمر: يرمز الى الامل والاشراق والقوة 
الابيض : يرمز الى النقاء والصفاء
الاسود : يرمز الى عصور الاستعمار التى مرت على مصر 
لكن مع رفع العلم المصرى فى اوائل 1953 من جانب حركة الظباط الاحرار كانوا يقصدون شيئا آخر من خلال تلك الالوان 
فالأحمر يرمز إلى دم الشهداء في سبيل التحرر عبر العصور
الأبيض: يرمز إلى العهد الجديد أو السلام والتحرير والرخاء
الأسود: يرمز إلى العهد البائد والإستعمار وأعداء الثورة
واهى كلها شعارات معليهاش جمارك

واختلف الشعار عبر الزمن فبدأ عقاب ومع الوحدة مع سوريا فى عام 1958 اتقلب نجمتين وبعدها ايام السادات اصبح صقر قريش وجاء حسنى مبارك ليهدم دار الندوة ويتحد بقلعة صلاح الدين بليتخذ من نسر صلاح الدين الايوبى رمزا وشعارا للدولة .. اللى هو ختم النسر بالصلاة على النبى 
كل رئيس جه كان ليه بصمة ومش سايب حاجة مبيلعبش فيها حتى العلم 
الوان العلم ظلت ثابتة طوال اكثر من 60 سنة وتم التلاعب فقط فى الشعار 
لكن الواقع غير طبيعة فهم مضمون الوان العلم وماترمز اليه 
يعنى مثلا اعتقد ان نظرة الناس للعلم بعد النكسة كانت كده 

وفى الثمانينات فى ايام العز لما اتغير الشعار الى نسر صلاح الدين كان الشعار هو الكوسة ... دولة الكوسة 

ودايما كان اللون الاحمر هو دمكم اللى حيسيح يا شعب ياولاد الوزة والابيض جيوبكم يا شعب يا ولاد الهرمة والاسود حداد على ولادكم اللى حيتفشخوا أحياءا وأمواتاً

وفى عهد الاخوان بصراحة لا كان فيه علم ولا حتى دولة كان فيه شعار فقط 

وفى زمن السيسى اصبح العلم شئ تانى خالص 

محتاجين فعلا علم جديد يرمز لمصر وشعار لمصر وميكنش الدبورة 

عروس المملكة

المكان : حيث لا مكان 
التسمية : بساط الأنس
وضع الكاميرا : جانبى 
الأجواء : مظلمة الا عمن ترى
الوصف : دائرة مكتملة ترى قطع مكافئ منها ويقبع باقيها فى ظلمة المشهد 
الحضور : فتيات صغيرات حمراوات البشرة سوداوات الشعر عمرهن واحد من 7-9 سنوات لهن جميعا مظهر واحد فى الشكل والملامح والحركة والجلوس والظهور 
الفعل : يمارسن الطبل على لحن واحد

الصوت : ترنيمة واحدة غير مفهومة الكلمات بصوت طفلة عذبة الصوت تسيل منهن الكلمات نغم 
فى جانب الظلمة كان عروس المملكة محجوبا عن الانظار فلو اشرق نوره لطاش عقل الرائى 

فى حياتنا الدنيا هناك عُرس وهناك عروس وهناك عريس ... ذكر وانثى 
لكن فى اللامكان ليس من ذكر وأنثى .. فعروس المملكة هو اجمل مخلوق بالمملكة وزينتها وبهائها ومحور ارتكازها .. النقطة التى عليها يرتكز مدارها وقطرها ونصف قطرها ومحيطها
فوق البساط حيث لا فوق ، ابتهجن فرحين بعروس المملكة الكامن والخفى عن الرؤية والسمع الموصوف فى الاسراء بأنه هو السميع البصير ... فصلاة ربى وسلامه عليه 

ظهور الكنز

رأيت فيما يرى الناظر فى اليقظة 
شعوبا وأمم من مخلوقات لا يعلم عددهم الا من خلقهم .. كل أمة متساوية فى الخلقة فكل أمة يحمل اشخاصها صورة واحدة فلا تنوع فى صور شخوص كل أمة 
أمم تسكن كامل المملكة .... مملكة الوجود 
والمملكة على اتساع لا نهائى ... تعلم من المشاهدة ان للمملكة نهاية ولكن رؤيتك عاجزة عن ادراك النهاية من فرط العدد 
كل أمة لها طقوس خاصة بها .. فكل أمة تغنى على الطبول بترانيم موحدة لصوت انثوى رخيم 
كل أمة لها لغتها الخاصة بها والتى تتميز عن غيرها من الأمم 
والكل يرتدى الوان زاهية لا تعرف وصفها من اسمها 
كل المملكة ظلمة الا عن رؤية تلك الامم بأشخاصها والوانها وكأن الظلمة حوتهم لتنحصر الرؤية فيهم فلا تنشغل بشئ فى المملكة عما عداهم ... اخراج سينمائى بديع

تستطيع أن تسمع كل لغات تلك الامم وهو ينشدون طربا .. وهم يرقصون ويفرحون ... يشملهم ابتهاج لا نهائى 
لا تستطيع ان تميز حروف اللغات المتباينة ولكنك تفهم معنى واحد 
الكل بلا استثناء ينشدون ويرقصون ويطربون ويبتهجون لمعنى واحد فقط وهو ظهور الكنز 
كل الأمم .. كل المخلوقات .. كل الأشخاص يبتهجون لأن الله ظهر للعالم 
انهم سعداء لانهم بعض هذا الكون الذى قد خلقه وظهر له وتجلى فيه 
ما وجدت اسعد منهم بربهم 
وحين سألت : كم مضوا على حالهم ؟؟
كانت الاجابة : أزلٌ وأبد
تعالى الله وتبارك الله رب العالمين 

الحمد والرحمن (1)

من حوالى 15 سنة راجع فى ميكروباص ومعايل فولدر شفاف فيه اوراق مطبوعة وعدد من علب السجائر السوبر (ساعة ما كنت بشرب سوبر) والسجائر واضحة وركب جنبى سلفى أو ما بعد السلفى .. أحد ببغاوات الدين 
وفتح الكلام وبدأ بذكر نعم الله التى لا نحصيها وانه اعطى نعمه لكى نعبده بها ومثل هذا من الكلام اللى ميجيش معايا ولا مع دماغى الصعيدى المتربسة 
انتهيت معه ان اول النعم هى نعمة الوجود مرورا بغيرها من النعم التالية كالصورة الانسانية وتأتى نعمة الاسلام كنعمة رابعة من النعم الأصول
وربما منذ سنوات قليلة تغيرت لدى مفاهيم النعمة والجود والكرم الإلهى وطبيعى ان نراجع مفاهيمنا ومعتقداتنا من زمن الى زمن 
ان العقل تربة والسماء تنشق عن امطار فاذا تشربت تربة العقل بأمطار الالهام السماوى كانت النبتة وحصد الفهم 
ومنذ سنوات قليلة ادركت معنى الحمد لله رب العالمين .. الآية الثانية من سورة الفاتحة باعتبار ان البسملة هى أول آية فى القران الكريم ... فأول ما بدأ الله القدير بعد البسملة هو ان حمد نفسه بنفسه فكان الحمد منه ابتداءاً واليه انتهاءاً واختار المولى العزيز الرحيم ان يكون الحمد من حضرة الربوبية (( رب العالمين)) وكان ((العالمين)) فخطابه موجه للعالمين الذين هم مقيدون بالسمع والبصر 
فمن هذا الباب ... باب التقييد كانت امثال ((وان تعدوا نعمة الله لا تحصوها )) وغيرها من الآيات التى تعتمد على مشاهدة بالعين وغيرها من وسائل الادراك بالمحسوسات (( وفى انفسكم)) وهو ما توقف عنده ظاهر الحس وتوصل اليه صَبّار الفهم (نبات الصبار الذى ينبت فى الاراضى الصحراوية التى لا ماء فيها ولا يعطف عليها مطر) 
ان العقول الصَبّارية الصحراوية تقف عند حدود المحسوس فأولها عند رفح واخرها عند السلوم ومبدأها البحر المتوسط شمالا وحدود السودان جنوبا فما من امطار سماوية ولا فيوضات غوثية 
ولكنها ذات الآية شطرها الأول ((الحمد لله)) هو المعنى والمتعلق بحمد الله لله ... فالله تعالى يحمد الله على الله (كنت كنزا مخفيا فأردت أن أٌعرف فخلقت الخلق) فالله كنز ... والله يحمد الله على ظهور الكنز ... والله يحمد الله على كونه كنز ... والله يحمد الله على معرفة الكنز ... وذلك الحمد الالهى للذات المقدسة كان فى مرحلة بعد الأحدية وظهور الكنز فى صورة المرآة وإظهار الوجود فكأنها المرآه قد نطقت بحمد الله عند الايجاد .. وهو ما يماثل فى التراث أن اول ما نطق به آدم بعد نفخ الروح هو انه عطس وقال الحمد لله 
فالحمد منه واليه ومنه ابتداءا واليه انتهاءا 
فإنى ان حمدت الله فانى احمد الله عليه كأصل أول ونهائى فهذا اول الحمد ومنتهاه عندى أما ما تعارفنا عليه بنى قبائل عك بعموم الاراضى العربية فهو من باب جلب مزيد من الرمال للأراضى الصحراوية العطشى للفهم والادراك 
فمقتضيات الجود والانعام والكرم الالهى من رزق وصحة وستر وغيره هى من افعال الاسماء الالهية التى كانت بعد حمد الله لله 
وانك اذ اعتبرت البسملة آية وكانت الحمد لله الآية الثانية فتوجب عليك ان تجهر ببسم الله الرحمن الرحيم قبل ان تجهر بالحمد لله رب العالمين ... فكان الجهر للكون مبدواءا من الله باسمه الله واسمه الرحمن وكلاهما اسم معبر عن ظاهر الذات (قل ادعوا الله أو ادعوا الرحمن) فكان الابتداء انه صادرا من الله الرحمن مقرونا بصفة الرحيم ،، فالرحيم فقط هى الصفة 
والثابت عند العلماء ان الله خلق الرحم واشتق اسمها من اسمه (الرحمن) فالرحمن اسم أما الرحيم فهى صفة منها (كتب الله على نفسه الرحمة) و (سبقت رحمتى غضبى) 
وتجد الاسم الالهى المعادل لاسم الله هو اسم الرحمن (( الرحمن علم القران)) ، (( الذى خلق سبع سموات طباقا ما ترى فى خلق الرحمن من تفاوت )) ، ((قل هو الرحمن آمنا به وعليه توكلنا)) 
أما ما يقال عن رحمن الدنيا والاخرة ورحيمهما ففهم المشايخ يذهب الى صفة الرحمة من الرحمن وصفة الرحمة من الرحيم فكأن الرحمن رحمة مساويا للرحيم رحمة فى حين ان الاسم الله متعلق الجلاله ولا علاقة له فى هذا المقام بالصفات 
اذا كانت صفات الله جميعها من علم وارادة وسمع وبصر وحياة ورحمة وحلم وجود وكرم وغيرها تفهمها انها متعلقة بفهمك اسم الله فنفس الفهم ذاته متعلق باسم الله الرحمن المساوى والمعادل والمكافئ للاسم الله 
فاذا كان الاسم الله هو الاسم الجامع للأسماء وهو علم على الذات المقدسة فالاسم الرحمن علم على الذات المقدسة لقوله تعالى ((قل ادعوا الله أو ادعوا الرحمن أيا ما تدعوا فله الأسماء الحسنى)) ولاختصاص الاسم الرحمن بأفعال تتعلق بكل ما يتعلق به الاسم الله 
أما الاسم الرحيم فهو صفة الرحمة .. والرحمة كصفة نفسية مشتقة من الاسم الرحمن فهكذا شاء الله تماما كما ان تعليم القران من اختصاص الاسم الرحمن وانك يستحيل ان تسمى مولودا أو كائنا باسم الله فانه يستحيل عليك ان تسميه رحمن 
فعيب وكبير العيب وقلة أدب مع جلال الله أن يقال ان الاسم الرحمن مشتق من الرحمة .. الاشياء والصفات والمفاهيم تشتق عن غيرها وما سماه الله هو افضل تسميه وما سمى الله به نفسه هو الاصل فالرحمة اشتقها الله من الاسم الرحمن وصفتها الرحيم وليس ان يسمى الله نفسه اسما مشتق من معنى فالله موجود قبل المعانى يا بنى عك فالمعانى يتم ادراكها منه لا ان يدرك نفسه بعد خلق المعانى 
وتسمع علماءنا فى شرح معنى الرحمن ((( انه هو ذو الرحمة الشاملة لجميع الخلائق في الدنيا، وللمؤمنين في الآخرة، أي: إن رحمته عامة تشمل المؤمن والكافر في الدنيا، وخاصة بالمؤمنين فقط في الآخرة قال تعالى: {الرَّحْمَنُ عَلَى الْعَرْشِ اسْتَوَى} [طه:5]، فذكر الاستواء باسمه (الرحمن) ليعم جميع خلقه برحمته.))) 
وهذا كلام باطل يراد به (الالحاد فى أسماؤه) وتغيير مفهومك ومعرفتك بالله و قطع الصلات بينك وبينه فكيف تعرف الله اذا كنت لا تعرف اسماؤه وتفرق بين ما هو اسم وما هو صفة ... 
وتعقيبا ايضا بقول العلماء (((الرحيـــــم: هو ذو الرحمة للمؤمنين يوم القيامة، كما في قوله تعالى: {..وَكَانَ بِالْمُؤْمِنِينَ رَحِيمًا} [الأحزاب:43]، فخص برحمته عباده المؤمنين.))) من اين يأتى مثل هذا الفهم وكأنه الرحيم ده شغال لمن آمن فقط فى الدنيا 
وكأن الرحمن والرحيم (تعالى الله عز وجل ) أشبه بـ سعد وسعيد ومسعود .. سعيد بيعمل حاجة ومسعود مختص بحاجة تانية والمعلم سعيد مبيعملش حاجة 
اقول وقلبى مشغول ان الرحمة لم تستوى على العرش لتسع الدنيا .. ان الذى استوى على العرش هو الرحمن 
ان الرحمة لم تستولى على العرش لتسع الدنيا .. ان الذى استولى على العرش هو الرحمن 
تقدس الله فى علاه فالاسم الله هو الاسم الجامع المعبر عن ظاهر الذات المقدسة وقد توجه اسم الله الرحمن ليقضى امرا كان مفعولا فتوجه الرحمن للخلق والايجاد وهو من استوى على العرش فيستحيل على الذات ان تستوى على العرش
الغريب ان الناس مشت ورا بعضها وتوسعوا فى محاولات التفسير وسقطوا جميعا فى الفخ الأزلى (( وما قدروا الله حق قدره)) ، ((واتقوا الله ويعلمكم الله)) فما نسمى شيئا بغير ما سماه الله