حور

اهل الجنة قد استراحوا

فى الجنة

سكنوا الى الحور 

لم يقرأو الكتالوج بعد 

ولم يعلموا أنهم بذواتهم تحولوا حورا

الكمين - 2 - همّ بها

هذا الكمين شديد جدا جدا وهو فى سورة يوسف 

قصة رسول الله يوسف مع إمرأة العزيز 

ولاحظ دايما انه هناك فرق فى ايات القران فلم يكن صدفة أو سجع أن يكون هناك ... أمرأة وزوجة وصاحبة 

فالخالق المتكلم بكلام مقروء (القران) عارف هو بيقول ايه ... لكن عقولنا مش عارفه هى بتقرأ إيه ولا فاهمة حاجة 

تقريبا كل المفسرين قالوا كلام مشين فى حق رسول الله ونبيه يوسف صلى الله عليه وسلم 

انه هم بها بعد أن همت به لولا ان رأى برهان ربه والكلام فتح معاهم بمشاهد تصويرية ممكن تجدها فى العهد القديم (السرد المنقول عن بنى اسرائيل) لكن القران شئ تانى خالص 

شوية تركيز

همت به = وراودته التى هو بيتها ... الست كانت عايزه حاجة معروفة ... رغبة جنسية مستميتة تلتهم هدوءها وتفوق كل حدود الحياء والأدب تغلق الابواب وتقول هيا انى بين يديك فافعل ما أشاء وما تشاء كذكر وانثى

هم بها = لنصرف عنه السوء والفحشاء 

الهم هو هو العزم على فعل الشئ ولكن لا يفعله ... انه مجرد رغبة فى الفعل تجاه اى شئ وليس مقصوده الشهوة الجنسية 

ولم يكن هم يوسف هو شهوة حتى رأى برهان ربه 

تذكر ان يوسف بعدها تركها متوجها للخروج فجذبته من ملابسه من ظهره فانقطعت ملابسه وهى دليل براءته 

هل للرسال والانبياء نفوس مثلنا تميل نحو الشهوة 

هل الرسل معصومون من الذنوب صغيرها وكبيرها 

هل تظن ان يوسف الرسول ربيب الاله الخالق والذى تم إكرام مثواه فى بيت العزيز يفعل او يهم بذلك الشين 

الحكاية حكاية سوء وفحشاء 

الفحشاء معروفة ... فاغلب تعريفها هو الزنا وكل ما يؤدى اليه 

لكن السوء هو القبيح من القول ... موجود ضمن تعريفات اللفظة فى القواميس العربية وبالبلدى كده فلان أساء اليك فعل معك ما لا يصح ومخالف للأدب كأن يكون شتمك او تكلم عنك بما لا تحب أو اضرك بفعل وقول ...الخ 

هل ممكن نقول يوسف الرسول ضجر منها تدعوه فيفر قائلا معاذ الله انه ربى احسن مثواى (يقصد العزيز الذى اكرمنى وعاملنى معاملة الاب للولد لا معاملة المالك للمملوك) ثم يجلس منها مجلس الرجل من المرأة ويحل دكة ازاره 

ان يوسف ضجراً منها كاد ان يدفعها ويعتدى عليها بالسوء من القول (يشتمها) أو من العمل (يضربها) فأظهر له ذو الجلال والاكرام برهانا فلم يفعل وبدأ يسبقها خارجا من الباب فليس من الرسل من يسب أو يضرب 

هذا ما عندى وان شئت استخرج كل ما قاله الله فى كتابه المقروء عن الفاحشة والسوء ولا تلتفت لتحليلات المفسرين 

ان مجرد صدور الهم الشهوانى من يوسف أو (هم الفاحشة) لا يصح ولا يجوز 

ولما كان الخروج من الأزمة بسب المرأة وضربها فكان ذلك لا يصح ايضا فى حق الرسل وكلهم نالوا حظا وان كان اقل من (وانك لعلى خلق عظيم ) 

لن يضرك ابدا براءة يوسف ولن يضرك ابدا انه هم بها بمعنى الضرب والشتيمة 

فى مطلع السورة قال تعالى (نَحْنُ نَقُصُّ عَلَيْكَ أَحْسَنَ الْقَصَصِ بِمَا أَوْحَيْنَا إِلَيْكَ هَذَا الْقُرْآَنَ وَإِنْ كُنْتَ مِنْ قَبْلِهِ لَمِنَ الْغَافِلِينَ) فهذا احسن القًصًص وليست قصة من قصص الزنا والفجور وكنت لا تعلم حقيقتها وغافل عن فهمها يا محمد (صلى الله عليه واله وسلم) فالان قد علمت 

وانت يا من قرأت قد علمت فالتزم بما علمت ولا تسئ الى رسول كريم له حظ من (وانك لعلى خلق عظيم)

انسان

يا غايب

الى كل من لقيته يوما وسكن قلبى وعقلى ودارت الايام بنا الى كل الاصدقاء والاحباب ,الاقارب

وجودكم كان دائما منعشا وايادى تضاف الى قدراتى فى مواجهة الحياة

يا غايـــــــــــــــــــــــــــب - فضل شاكر

الكمين 1 : الجمل

الحمد لله الذى هدانا الى الايمان به وسلوك سبيل التعرف اليه والفهم عنه فكما ان الايمان نور فان العقل والفهم اذا اقترنا بالايمان فهو نور على نور ... 

بعد 20 سنة من الملاحظة والتعريف والتدقيق قد استنتجت (لى وحدى) ان حالة الدين التى نعيشها هى حالة مزيفة 

أوهام الشيعة وضلال اهل السنة والجماعة وتشرذم التصوف الحالى (الا عن خبير) 

وانا مثلى مثل الجميع انتمى الى اهل السنة والجماعة وهذا افضل حالا من ان اكون شيعيا مثلا 

وحتى لا أطيل فانى كنت ولم أزل ابحث عن المحجة البيضاء وهى الحالة التى ترك رسول الله صلى الله عليه وسلم المسلمون عليها  بقوله : تركتكم على البيضاء ليلها كنهارها لا يزيغ عنها بعدي إلا هالك

وبعد انتقال الرسول (وفاته) زاغ المسلمون عن ذلك الطريق وكلما مر الزمن زاد الزيع والتوهان عن الجادة ووضعنا دينا قديما ودينا جديدا دينا قديما وضعه كل أحد أو أى أحد بعد انتقال النبى ... ودينا جديدا يحاول ان يساير التقدم الانسانى الحضارى والعلمى والثقافى ودون جدوى 

وكلا الدينين الاسلام السلفى والاسلام المعاصر عن نفسى برئ منهما فلا أحد منهما يقترب الى المحجة البيضاء 

وقد ساهم العلماء قديما وحديثا بمساعدة الحكام فى صياغة الدينين الجديدين بشكل كامل وسبب قبول عامة المسلمين لهذا الزيغ الذى كانوا يطلقون عليه علم وحكمة وتجديد ... سبب قبولهم اعتبار غير علماء الدين بوصفهم عامة لا يقدرون على شيئا أو كأنهم الانعام 

إن أخطر ما لديك ويمكن ان تواجهه هو التفسير والحديث والسيرة 

وسأعرض على مدار الأيام حيلة الفخ .. وهو فخ قد وضعته لمؤلفين لا حصر لهم عند تفسير القران فإن سقط المفسر فى الفخ علمت ان كلامه مردود وانه ببغاء لمن سبقوه واعمال العقل ونهم الفهم فى اقل مستوياته عنده 

فى سورة الأعراف قال تعالى : إِنَّ الَّذِينَ كَذَّبُوا بِآيَاتِنَا وَاسْتَكْبَرُوا عَنْهَا لَا تُفَتَّحُ لَهُمْ أَبْوَابُ السَّمَاءِ وَلَا يَدْخُلُونَ الْجَنَّةَ حَتَّىٰ يَلِجَ الْجَمَلُ فِي سَمِّ الْخِيَاطِ ۚ وَكَذَٰلِكَ نَجْزِي الْمُجْرِمِينَ (40)

علمونا التالى : مستحيل عليهم يدخلوها ولو دخل الجمل مع كبر حجمه فى خرم الابرة 

 

ههههه الجمل الكبير الضخم ده يعدى من خرم الابرة ؟؟؟ يعنى مفيش فايدة 

لكن السؤال ايه علاقة الجمل (البعير )بالابرة فهذا نوع وهذا نوع لا ينسجمان أبدا ولا علاقة بينهما 

استغفر الله العظيم كان ممكن نقرب شوية ونعكس الموضوع حتى يدخل الفيل فى فم الافاعى العمياء وهى طولها حوالى 3 سم وطبعا يستحيل عليها أن تبلع فيل (لا تنسى ان الفيل والحية كلاهما مذكور فى القران) وضربت لك مثال بأصغر الافاعى وليس أكبرها لتأكيد الاستحالة .. فكان الأولى ان ان تكون المقاربة بين صنفين من نوع واحد ثم عرض استحالة الاقتران التى تفهمها عقولنا 

فعلا القران غريب 

STOP STOP STOP  قف عندك رايح فين يا ريس قران ايه اللى غريب .. انت اللى مبتعرفش حاجة 

هذا التنزيل من لدُن حكيم خبير .... مش هرتلة وفهم مشايخ الموضوع مش كده خالص ولا هو لا بعير ولا ناقة ولا جمل 

الأول اعرف معنى كلمة سَمِّ هو الثقب (الخرم) سَمِّ الْخِيَاطِ هو ثقب الابرة وهو دقيق جدا 

تعالى نشوف اعظم التفاسير عندنا (اهل السنة والجماعة ) 

تفسير الطبرى : هناك قراتآن لكلمة الجُمَّلُ 

الأولى : فتح الجيم وتخفيف الميم 

الثانية : ضم " الجيم " وتشديد " الميم

والقراءة التى فى المصحف الذى بين يدى برواية حفص هى بالفتح الجَمَلُ 

جبت الكلام ده منين يا حفص ؟؟؟

مشكلتنا ان القراءة بالفتح تعنى الجمل وهو البعير يعن ان الجمل يدخل فى خرم الابرة 

وهى منسوبة فى التفسير الى عبد الله بن مسعود والحسن والضحاك وابى العالية  

القراءة الثانية بالضم والتشديد معناها الحبل الغليظ وقبل ما نعرض مضمون القواميس تعالى نشوف موضوع القراءة الثانية مع عبد الله ابن العباس فينسب اليه انه قرأها بالفتح وتم نسبها الى الجمل والرواية الاخرى بالضم وقال فيها الحبل الغليظ وفى اخرى حبل السفينة 

فيه تناقض بين ما هو منسوب الى ابن عباس كالعادة مع وجود السند 

حدثنا ابن وكيع قال، حدثنا يحيى بن آدم, عن ابن مبارك, عن حنظلة, عن عكرمة, عن ابن عباس: " حَتَّى يَلِجَ الْجُمَّلُ فِي سَمِّ الْخِيَاطِ"، قال: الحبل الغليظ.

دثني يحيى بن طلحة اليربوعي قال، حدثنا فضيل بن عياض, عن منصور, عن مجاهد, عن ابن عباس في قوله: " حَتَّى يَلِجَ الْجُمَّلُ فِي سَمِّ الْخِيَاطِ"، قال: هو قَلْس السفينة

حدثني محمد بن سعد قال، حدثني أبي قال، حدثني عمي قال، حدثني أبي, عن أبيه, عن ابن عباس: (حتى يلج الجمل في سم الخياط)، وهو الجمل العظيم، لا يدخل في خُرْت الإبرة، (27) من أجل أنه أعظم منها.

حدثني المثنى قال، حدثنا عبد الله بن صالح قال، حدثني معاوية, عن علي, عن ابن عباس: (حتى يلج الجمل في سم الخياط)، والجمل: ذو القوائم

أما عكرمة, فإنه كان يقرأ ذلك: " الْجُمَّلُ"، بضم " الجيم " وتشديد " الميم ", وبتأوّله كما:-

14644- حدثني ابن وكيع قال، حدثنا أبو تميلة, عن عيسى بن عبيد قال: سمعت عكرمة يقرأ: " الْجُمَّلُ" مثقلة, ويقول: هو الحبل الذي يصعد به إلى النخل.

14645- حدثنا محمد بن بشار قال، حدثنا مسلم بن إبراهيم قال، حدثنا كعب بن فروخ قال، حدثنا قتادة, عن عكرمة, في قوله: " حَتَّى يَلِجَ الْجُمَّلُ فِي سَمِّ الْخِيَاطِ"، قال: الحبل الغليظ في خرق الإبرة. (30)

14646- حدثني محمد بن عمرو قال، حدثنا أبو عاصم قال، حدثنا عيسى, عن ابن أبي نجيح, عن مجاهد في قوله: " حَتَّى يَلِجَ الْجُمَّلُ فِي سَمِّ الْخِيَاطِ"، قال: حبل السفينة في سمّ الخياط.

14647- حدثنا القاسم قال، حدثنا الحسين قال، حدثني حجاج, عن ابن جريج قال، قال عبد الله بن كثير: سمعت مجاهدًا يقول: الحبل من حبال السفن.

جميل لغاية دلوقتى تعالى نشوف القواميس :

فى معجم المعانى الجامع : 

الجَمَلُ : الكبيرُ من الإِبل من الفصيلة الإِبلية ، من رتبة الحافِريَّات المجترَّة ، ومنه ما هو ذو سَنَامَيْن

ما اسْتَتَرَ من قادَ الجَمَل : يضرب لمن يأْتي أَمْراً لا يمكنُ إِخفاؤُه

اتَّخَذَ اللَّيْلَ جَمَلاً : يضرب لمن يعمل عَمَلَه بالليل ؛ كأَنه رَكِبَ اللَّيْل ولم يَنَمْ فيه

الجَمَلُ : الحبْلُ الغليظُ

الجَمَلُ : سَمكةٌ بَحْرِيَّةٌ

وكلها قراءات بالفتح والاكثر مناسبة حتى يدخل الحبل الغليظ فى ثقب الابرة فكانت المناسبة فهذا هو القول الإلهى بحكمته ومراعاة فهم الناس فهذا هو الاقرب 

وعند ابن منظور فى لسان العرب :

الجَمَل: الذَّكَر من الإِبل

حتى يَلِج الجَمَل في سَمِّ الخِياط؛ قال الفراء:الجَمَل هو زوج الناقة. وقد ذكر عن ابن عباس أَنه قرأَ: الجُمَّل، بتشديد الميم، يعني الحِبَال المجموعة، وروي عن أَبي طالب أَنه قال: رواه القراء

الجُمَّل، بتشديد الميم، قال: ونحن نظن أَنه أَراد التخفيف؛ قال أَبو طالب:وهذا لأَن الأَسماء إِنما تأْتي على فَعَل مخفف، والجماعة تجيء على فُعَّل مثل صُوَّم وقُوَّم. وقال أَبو الهيثم: قرأَ أَبو عمرو والحسن وهي قراءة ابن مسعود: حتى يلج الجُمَل، مثل النُّغَر في التقدير. وحكي عن ابن عباس: الجُمَّل، بالتثقيل والتخفيف أَيضاً، فأَما الجُمَل، بالتخفيف، فهو الحَبْل الغليظ، وكذلك الجُمَّل، مشدد. قال ابن جني: هو الجُمَل على مثال نُغَر، والجُمْل على مثال قُفْل، والجُمُل على مثال طُنُب، والجَمَل على مثال مَثَل؛ قال ابن بري: وعليه فسر قوله حتى يلج الجَمَل في سَمِّ الخياط،فأَما الجُمْل فجمع جَمَل كأَسَد وأُسْد. والجُمُل: الجماعة من الناس.

واحد ييجى يتبع مفسر ويقولك انت حتستحيل على ربنا انه يخلق جمل صغير جدا ممكن يدخل فى خرم الابرة ... ايه الكلام العجيب ده 

ينتهى الأمر عند حد فهمى (وليس عند عبد الرحيم عمرو) ان المناسبة تقع بين الحبل الغليظ جدا وبين ثقب الابرة وهو معنى الكلمة أما القراءات فأقول حسبنا الله ونعم الوكيل فمن الواضح اننا مبنعرفش عربى ولو صدقت روايات اختلاف النطق لأكدت لنا اننا مع القران فى الباى باى 

انظر الى هذا التخريف

البناء بالمقلوب - 1-

علشان تكون فيه دولة لا بد من توافر ثلاثة مقومات اساسية ... شعب وارض وحكومة واذا فقدنا واحده من تلك المقومات مفيش دولة 
مثلا .. السلطة الفلسطينية تمثل حكومة وهناك شعب فلسطينى .. لكن مفيش أرض فالأرض محتله ... فمفيش دولة 
لما يتجمع مجموعة من الناس فى منطقة جغرافية ما (حالة الطبيعة) ويقرروا انهم يختاروا من يمثل مصالحهم (حكومة) يصبح ليهم كيان ومتحدث باسمهم وتكون الخطوة التالية الحصول على اعلان بقية المجتمعات (الدول) بهذا الكيان كدولة 
ولما تكون فيه دولة فبناءها لا يكون عن طريق المبانى والحيز العمرانى فالشعب بطريقة تلقائية ساكن فى بيوت مكنتش عشش وخيام ورحالة بدو لما قامت الدولة وان كانت خيم وقبائل رحالة مثل الكويت مثلا فتبدأ الحكومة بما يسمى العمران والعمران مصطلح اكبر بكتير من بناء البيوت وتحديث الدولة أمر طبيعى لكل حكومة وليس انجاز 

فى عهد المخلوع حسنى مبارك تم بناء عدد كبير جدا من الكبارى وادخال مترو الانفاق ورصف طرق جديدة بالاف الكيلومترات واى من هذه الامور لا يعد انجازا فالتوسع والتطور والتحديث شئ طبيعى مع نمو المجتمعات والسكان وظهور الاحتياجات التى تسهل من انتقال وحياة البشر 
افترض انى مسكتو واخد رئيس لمصر وبنيت 10000 كوبرى وطرق بطول 10000 كم وبنيت مليون شقة ومليون شاليه ومليون فدان ورصفت كل الطرق رخام وياقوت ... فلن اكون قدمت اى انجاز فهذا هو الطبيعى 

دور الدولة بعد الحرب العالمية الثانية اختلف عن الدور التقليدى للدولة قبلها 
ووصف الدولة اختلف بعد الثورة الفرنسية عن وصفها قبلها 1789 م 
فيما مضى كان دور الدولة كل حاجة تخطر فى بالك لكن تحول لمجموعة من الأدوار الثابتة الرئيسية وهى الدفاع (الجيش) ، الأمن (الشرطة) الدبلوماسية (السياسة الخارجية) ، التعليم ، الصحة 
لكن دور الدولة كمنتج للسلع والبضائع انتهى 
وصف الدولة قبل الثورة الفرنسية كان الملك هو الدولة واخر لويس لفرنسا قالها صراحة (انا الدولة)وتاريخيا كان الملوك يحكمون بما يسمى الحق الالهى فالبابا له سيطرة ودايما فى ضهر الملك بوصف الملك له سلطان الهى وكأن الاله فوضه للحكم 
كانت شرعية الحاكم من هذا الحق الالهى .. فلو طلع قالهم انا ربكم الاعلى أو لا تعبدون أحدا من دولى أو أن الملك يملك البلاد والعباد وفى تاريخ الدولة العربية الاسلامية وجدنا امثال هذا مع ظهور الدولة الأموية 
أما الحاكم اليوم فله شرعية من خلال الانتخاب المباشر (رئيس منتخب) واغلب الملوك الباقين فى النظم الديمقراطية لهم صفة شرفية ومراعاة للتقاليد لكن ليس لهم سلطان الا على انفسهم فقط فالملك اليوم يملك ولا يحكم 
لكن تظل المنطقة العربية منطقة بزرميط فالملوك يرفضون كل ما يمكن وصفه بالديمقراطية فهم يملكون ويحكمون وشرعيتهم متنوعة فمنها شرعية القوة والاستيلاء او الانتماء لآل البيت فلدينا أمراء مؤمنين لم يزالوا حتى اليوم يحكمون 
والدول التى اخذت بالنظام السياسى الغربى بانتخاب الحاكم وهيصة وزفة الانتخابات الحاكم مبيمشيش بيفضل قاعد حتى آخر العمر مع نجوى ابراهيم  بياخدها بالقوة حتى لو كان كسيح أو اعوج أو قعيد ولنا فى عبد العزيز بوتفليقه أكبر مثال

ومنهم من يأخذها بالقوة فيعدل الدساتير ليستمر حتى الموت وقد كان الحبيب بورقيبه فى تونس
ومنهم من جعلها جمهورية وراثية والامثلة لا تنتهى لكن بشار ومحمد بن زايد قاعدين على قلوبكم 
لو مسكت كل دولة عربية ستجدها هكذا 
ان بناء الدول يبدأ ببناء الدساتير والقانين الحاكمة والواصفة لشكل النظام السياسى فى الدولة فالبناء اصلاح والهدم تخريب أما الترميم فهو عمل عبثى لا يدوم الا فترة وجيزة 
انا لو بنيت 30 مدينة ميبقاش انجاز فى دولة مهترأة المؤسسات لكن البناء اللحقيقى يكون بناء المؤسسات القائمة على مبدأ سيادة القانون .. القانون والقانون فقط 
انا لو بنيت ابنى الانسان يا فرحتى بنيت بيوت وسكانها زومبى ومواطن كرتونة يبيع نفسه وضميره علشان كرتونة رز ومكرونة 
أشك ان العقلية المصرية الحديثة أصبحت تتناول الــ Shit (الغائط - البراز) فاحنا لما نغذى عقولنا بالهباب ده حنكون ايه فى النهاية زومبى ... اسفوخس 
وللحديث بقية

الخبير من الناس

كلمة professional باللغة الانجليزية تعنى المحترف - المهنى - الحرفى - الفنى 
واحد من الناس متخصص فى مهنة أو حرفة ويجيدها بحق 
بينما كلمة specialist تعنى المتخصص - الاخصائى - الخبير
أما expert فهى الخبير - الجهبذ - الحُجة - العلامّة   
تعد كلمة specialist هى الافضل عند التعبير عن لفظ الخبير الممارس باحتراف مهنة معينة أو علما ما 
وكلمة الخبير غير متداولة فى ثقافتنا فنحن لم نتعرض اليها فى مراحل الحياة الا من خلال استقدام خبير اجنبى يدرب منتخب مصر لكرة القدم أو اليد أو حاجة مرتبطة بالالعاب الرياضية 
لما كبرنا شوية سمعنا خبراء فى الاقتصاد - الزراعة - فروع علمية كثيرة 
لكن لم نصدق ابدا كلمة خبير مصرى لان وضع مصر الثقافى والحضرى والاقتصادى وغيره ترجمة على انعدام هؤلاء الخبراء فمعندناش خبراء فى شئ !!!!
وحضرتك كده لما يجيلك مرض وتبحث عن دكتور شاطر تلاقى 3 اصناف ممارس واخصائى واستشارى 
الممارس ده واحد بيقعد يجرب فى الناس والاخصائى يفترض انه هو الخبير specialist أما الاستشارى فالكلمة قد تعنى  advisor وتعنى الناصح لكن الأصح consulted وهو المستشار الذى تستشيره لا تطلب منه النصح 
وطبيعة الأطباء أن الاستشارى هو الاكثر خبرة والأفضل والذى يتعين ان يكون هو الخبير 
وفى جانب الدين والعقيدة لا تجد اى استخدام لكلمة الخبير فى الاسلام الا الوصف الإلهى للمولى عز وجل ... الخبير 

وتتنوع كلمة الخبير فى القران لتدل على كونها صفة للمولى عز وجل وتعنى العالم بما كان وبما يكون ولا يخفى عليه شئ (ظاهر أو باطن - معقول أو محسوس) فى كافة أركان ملكه وملكوته 
الله سبحانه وتعالى اطلق صفاته للانسان (الصفات لا الأسماء) كمثال لا على سبيل الحصر : العالم الملك الخبير اللطيف الكريم القوى الشديد السميع البصير العزيز الكبير الجواد الرحيم البر الجليل الرشيد الصبور ... الخ
ولفظ الخبير فى القران محصورا بين : الخبير - خبير - خبيرا
ومع لفظة خبيرا تقع المسألة 
قوله تعالى فى سورة الفرقان الرَّحْمَنُ فَاسْأَلْ بِهِ خَبِيراً (59) 
احبابنا من المفسرين قالوا باختصار شديد : يا محمد إذا أخبرتك شيئا, فاعلم أنه كما أخبرتك, أنا الخبير.. فليس اعلم من الله ورسوله ومعناها فاسأل الله عن الرحمن وهذه طامة كبرى 

وتعالى ننظر الى معنى الترجمة الانجليزية 

http://quran.ksu.edu.sa/translations/english/365.html?a=2914

the Most Merciful, so ask about Him one well informed
وستلاحظ بداية خطأ فى ترجمة اسم الله الرحمن فهو اسم وليس صفة العظيم الرحمة 
والترجمة الحرفية : العظيم الرحمة لذا فاسأل عنه واحدا لديه علم به 
يعنى اسأل عن أحد يعرف عن هذا الاله العظيم الرحمة وهذا الذى تسأله فسوف يجيبك 

ومع ترجمة أخرى :http://quranopedia.com/quran/25vs59

 Allah Most Gracious: ask thou, then, about Him of any acquainted  هنا مطلوب ان تسأل عنه أى مُطلع acquainted
فيبدو ان الترجمة لا علاقة لها ابدا بالتفسير 
التفسير يرد الخبير الى الله ولما استعيب المسلمون ان لا يكون الرسول خبيرا بالله (الرحمن) قالو اسأل يا محمد الله عن الله (الرحمن) 
فى حين ان الترجمات الانجليزية تعنى اسأل أحدا خبيرا عن الله (الرحمن) 
وفى الحقيقة كالعادة سقطت التفاسير وحرفت مفهوم المعانى والالفاظ بما تقتضيه 
جاءت اليهود الى الرسول صلى الله عليه وسلم وسألوه عن نسب ربه فكانت الإجابة { قُلْ هُوَ ٱللَّهُ أَحَدٌ } * { ٱللَّهُ ٱلصَّمَدُ } * { لَمْ يَلِدْ وَلَمْ يُولَدْ } * { وَلَمْ يَكُنْ لَّهُ كُفُواً أَحَدٌ }
النسب زى كده ما نقول لبعض كبشر انت مين وابن مين ... نسبك ايه؟؟ 
والذى اجاب هو رب العزة تعالى عما يصفون فأعطى صفات خارقة يستحيل ان يوصف بها غيره .. 
وفى سورة البقرة (186) وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ 

جبريل جاء يسأل عن الاسلام والايمان والاحسان فأجابه النبى دون وحى الهى فسؤاله كان عن العقيدة وليس عن الذات الالهية فلا اعلم بالذات الا الذات أما معرفة الحضرة الالهية وحضرات الاسماء فهناك خبير وخبير وخبير ولا يخلو عنهم زمن 
ان الخبير هو الذى يدلك على الله (وليس الذات) يدلك على الطريق البداية والمراحل ويصحبك فى سيرك الى الله حتى الغاية المنشودة التى لا نهاية لها وهى الله الرحمن عز وجل ... فان الله عز شأنه لا يمانع ان يكون هناك عالما بحضرته ولكن يستعيب علماء التفسير ذلك لانهم عاجزون عن ادراك او قبول الشأن الالهى كما ينبغى له عز وجل  

وَمَا قَدَرُوا اللَّهَ حَقَّ قَدْرِهِ إِذْ قَالُوا مَا أَنزَلَ اللَّهُ عَلَىٰ بَشَرٍ مِّن شَيْءٍ الانعام 91

مَا قَدَرُوا اللَّهَ حَقَّ قَدْرِهِ إِنَّ اللَّهَ لَقَوِيٌّ عَزِيزٌ الحج 74 

وَمَا قَدَرُوا اللَّهَ حَقَّ قَدْرِهِ وَالْأَرْضُ جَمِيعًا قَبْضَتُهُ يَوْمَ الْقِيَامَةِ وَالسَّمَاوَاتُ مَطْوِيَّاتٌ بِيَمِينِهِ ۚ سُبْحَانَهُ وَتَعَالَىٰ عَمَّا يُشْرِكُونَ الزمر 67

اللهم اهدنا سبل السلام ولا تجعلنا من الضالين ولا المضلين ولا من المغضوب عليهم أبداً يا رب العالمين

فتح عنيك واحلم معايا

اصل الأغنية 

غمض عنيك واحلم معايا 

وهات ايديك واحضن هوايا 

واضح انها اغنية عاطفية قديمة لمجد القاسم لكن لا اقول انها عاطفية فقليل من الاغانى العاطفية هى حالة انسانية لا تنطبق على حالة حب بين ذكر وانثى .. فكثيرا ما تفيض الكلمات لتعرج عن فضاء النص لتستقر فى أفضية المعنى التى تحمل افضية لونية معبرة عن حالة مزاجية للروح الانسانى لا علاقة لها بصورة الأبدان وقوانينها 

فالحالة ليست حالة عشق لذكر وانثى فأحيانا كثيرة تجد المُخاطَب (الموجه اليه الخطاب) فى العبارة كائن مجهول دون صورة ودون هوية لا يمكن وصفه مطلقا بالعدم فالعدم هراء لا وجود له فى زمن البشر .. وزمن البشر منطوق محسوس محدود أوليته معروفة ونهايته محسومة معلومة غير مجهولة ولكنك حين تخاطب هذه الأفضية وتعرج اليها فأنت تتخطى الزمن البشرى الى زمن سرمدى دائم معلوم الأولية مجهول الأبدية وفى هذا الزمن الذى تعرج اليه ستجد كائنات معنوية لا حصر لها من جهة الحرف أو الاسم او الاشارة أو اللون ... فحتى اللون يميز المعانى ولكن الالوان فى ذلك الزمن السرمدى الوان بكيفيات عديدة ليست من الوان الدنيا ولا يمكن التعبير عنها بوصف لونى بل أو بعبارة فمعنى اللون يكون منطبعا فيك تشعر فيضه وتهيم فى فضائة فترجمة اللون حالة شعورية غير محسوسة غير منطوقة ويستحيل التعبير عنها ... حالة شعورية تمس اللُب والفؤاد مباشرة وان كان القلب يدق إشعارا وتعبيرا عن ضخ الدم فالفؤاد يضج ويتقلب ويمرغ ارواحه فى طينة المعانى التى تصيبه .... فى مقتل فتفقد كل القدرة على الصمت وعلى الكلام

دولة الكراتين

سبق وسميت واعلنت ان المواطن المصرى اصبح اسمه رسميا عندى المواطن الكرتونة وده لان سعره عند الحكومة لا يتعدى قيمة الدعم المدفوع للمواطن على البطاقة التموينية ... 50 جنيها مواد تموينية ودعم يومى للخبز حوالى 3 جنيه يعنى فى الشهر حوالى 140 جنيها .. ده السعر الطبيعى والشهرى 
وفى المواسم يتم تقديم كراتين اضافية للمواطنين الكرتونة فى ايام الانتخابات والاستفتاءات وما شابهها 
مثلا فى الاستفتاء على تعديل الدستور الاخير تم صرف كوبون كرتونة من اسواق فتح بقيمة مائة جنيه لكل صوت انتخابى 
ومن زمان شفنا الاخوان واحتمال والله اعلم يكونوا هم اللى اخترعوا الكرتونة 
لأن الأصل والله اعلم ان الرشوة الانتخابية كانت فى الماضى كاش لكن لان الاخوان ناس بيتقوا الله (!!!!!!!) فمفيش مسمى الرشوة الانتخابية فيه كرتونة فى صورة ايه معرفش .. كرتونة انتخابية .. كرتونة ديمقراطية .. سياسية .. لم يكن لها اسم 
سمير ابو النيل نفسه قدم معونة انتخابية علشان الترشح عن حزب البلبل 

وطبعا اخر توزيع للكراتين كان فى التجماعات المؤيدة للرئيس السيسى فى اوائل شهر اكتوبر 2019 وشفناها فيديوهات 
اظن الكاش بيكون احسن من الكرتونة لانه اسهل فى الحمل والشيل ونقله بدون تكلفه وتعدد اوجه الصرف لكن كرتونة يعنى مفيش سيولة بل انك تشيل على قلبك وتمشى او تدفع مواصلات مع محدودية الاصناف الموجودة بالكرتونة 

المواطن الكرتونة مواطن مستعد يبيع نفسه مقابل سلع غذائية جامدة لا تتغير بوصفها سلع اساسية 
زيت وسكر وارز ومكرونة 

فكرة الكرتونة جت من عملية نصب كبيرة قام بها المصريون باسم الدين  فمن اساسيات الدين الاسلامى الانفاق فى سبيل الله ومن صور الانفاق ما يعرف بزكاة الفطر والتى يحل ميعادها فى رمضان ويتم اخراجها وفقا للفقه الاسلامى فى صورة سلع غذائية عينية - حبوب -  فاعتاد المصريون على كرتونة رمضان وهى دى عين النصب ... ازاى 
احنا طبيعة حياتنا عادات وحتى عباداتنا عادات فاتعودنا على موضوع شنطة رمضان وكرتونة رمضان 
انك تقف جنب الفقير انك تكفله ولو شهر فى السنة لكن انت تعطى الفقير الفتات الفتات 
يعنى هل اطلع 1000 على 100 فرد ولا اطلع الف جنيه على 10 افراد ... هنا وجهات النظر 
تعالى نشوف الكرتونة فى رمضان 2019 

 أعلى سعر

سعر كرتونة الخير الكبيرة: 99.95 جنيها

2 كيس أرز ” كيلو”

2 كيس سكر “كيلو”

3 كيس مكرونة “350 جرام”

1 زجاجة زيت خليط “750مللي”

1 سمن ” 350 جرام”

2 باكو شاي ناعم “40 جرام “

3 ظرف صلصة “50 جرام”

1 كيس فول “500 جرام”

1 كيس عدس “500 جرام”

1 كيلو بلح.

أقل سعر

سعر كرتونة رمضان في سوبر ماركت فتح الله سعر كرتونة الخير الأساسية: 46 جنيها

1 كيس أرز “كيلو”

1 كيس سكر ” كيلو”

1 كيس مكرونة “300 جرام”

1 زجاجة زيت خليط “800 مللي”

1 كيس بلح أسواني “500 جرام”

1 برطمان صلصة “280 جرام”.

أما توب التوب

سعر كرتونة الخير المميزة:110 جنيهات

1 علبة سمنة نباتي “700 جرام”

1 زجاجة زيت خليط “800 مللي”

1 كيس أرز “كيلو”

1 كيس سكر “كيلو”

1 كيس مكرونة “300 جرام”

1 كيس بلح أسواني “كيلو”

1 برطمان صلصة “280 جرام”

1 علبة فول مدمس “400 جرام”

1 كيس جوز هند “250 جرام”

1 كيس عدس “400 جرام”

1 لفة قمر الدين “400 جرام”

1 كيس زبيب “250 جرام”.

يعنى يوم ما تتعاظم تدفع 110 جنيه لكرتونة انت لا تقدمها لفقير بل تقدمها لاسرة كاملة عددها 4-5-6-7 ويمكن اكتر ودى حتكفى مين يا عم الحاج ... مش حينفع موضوع النوايا تسند الزير خصوصا مع ناس ساعات بيوصل دخلها الشهرى الى صفر جنيه 
لو سعادتك قررت تعمل كرتونة ب 100 جنيه عدد 100 كرتونة بتكلفة 10000 جنيه او حتى كرتونة بـ 50جنيه عدد 200 كرتونة
 اعمل كده لكن عند التوزيع الوضع يتغير 

 خليك فاكر انك لما بتطلع كرتونة بتلغى من حساباتك حاجتين وهما دخل الاسرة وعدد افراد الاسرة فيتساوى عندك اسرة من فردين مع اسرة من 10 افراد ويتساوى عندك اسرة عائلها يعمل عمل منتظم او عائلها لا يعمل على الاطلاق وده هو النصب 
لكن انت حتعرف تنصب على ربنا 
فيه واحد دماغه طايرة ورايحه منه بيقول : ليه منعملش مقام السيدة زينب من الذهب 
والله مقام السيدة زينب اغلى من الذهب والياقوت والماس لكن فى مجتمع مثل مصر مينفعش معانا ما فعله شيعة العراق 
العبرة مش بكمية المال المدفوع العبرة بطريقة الانفاق .. جل وتعالى الإله القدير الذى بين لنا اوجه الانفاق المختلفة للصدقات 
 إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ ۖ فَرِيضَةً مِّنَ اللَّهِ ۗ وَاللَّهُ عَلِيمٌ حَكِيمٌ (التوبة :60)
ولم يحدد الشارع كام لكام فلم يضع نسب معينة ثابتة لكل وجه من اوجه الانفاق السبعة لكن تتغير معدلات الانفاق وفقا لأغلبية بند على بند فقد يكون المدفوع للمرضى اكثر من المدفوع للغارمين وهكذا بتغير الظروف 
وطبعا قوله تعالى .. الصدقات ... فى حين ان رجالات الفقه سموها مصارف الزكاة 
هل انا على مدار السنة ممكن اطلع كراتين من باب الزكاة المقدمة للفقراء والمساكين والعاملين عليها .. ofcourse my dear 

1 سكر = 8ج + 1 زيت = 16ج + ا سمن كيلو نباتى ردئ الجودة = 20ج + 1 ارز = 11 ج دول كده = 55ج 
الكمية دى تكفى نفر واحد مدة اد أيه من الوقت ... نسينا المكرونة 
عامة الكمية دى متكفيش نفر فى اسبوع يبقى لازم اطلع 4 للفرد فى الشهر يعنى اسرة عددها 4 فرد لازم اعطيها 16 كرتونة 
16 كرتوة بسعر 55ج = 880ج اظن مش مبلغ مدفوع لاسرة فحصة الفرد 220 ج فقط 

وكده مع ال 16 كرتونة ينفع اقول النوايا تسند الزير لانك مكفتش الفرد احتياجاته  فين البيض والشاى واللبن والخضروات بلاش لا سمك ولا لحم ولا فراخ ولا دنادى (ديوك رومى) ولا حتى جناح بطه 
وفين قائمة الادوية الاعتيادية ومصروفات التعليم والتنقل والايجارات وفواتير المياه والكهرباء وكان الله بالسر عليم ... الزير أصلا تقيل جدا 
يبقى انت مع كمية السلع المقدمة المساوية لـ 200 او 220 جنيه للفرد سندت الزير بالنوايا 
وده مع انك سندت الزير شهر واحد من 12 شهر 
لو عايزين تفكروا فى الفقراء متقوليش شنطة رمضان وكرتونة رمضان ومطلع 100 كرتونة و1000 كرتونة 
طلع يا سيدى الف كرتونة لكن لازم تراعى مستوى دخل الشخص اللى بياخدها وتراعى عدد افراد الاسرة 
مش تديله كرتونة تكفى عيلة مدة 3 -4 ايام وتسيبه بعدها يتنشق على ريحتها 

{واتقوا الله وَيُعَلِّمُكُمُ الله والله بِكُلِّ شَيْءٍ عَلِيمٌ}(البقرة 282)

يا مطره رخى رخى

انا شخص اعتقد فى الولاية ... ولاية الله للبعض عباده الصالحين وليس كل المؤمنين فالايمان درجات وليس كل مؤمن مولاه رب العظمة والكبرياء لأن مفهوم الايمان الذى نعتقده ناقص وبه ابهام وتحريف وتغيير 
ومن حوالى اسبوعين لما الدنيا هايجة على موضوع سد النهضة ومش حيكون فيه ماء كافى للمصريين وتبوير 4 ملايين فدان بعد كام سنة والهيصة والزمبليطة اللى عاملينها فى صالون الدولة المصرية 
قلت يا نفسى يعنى يا ربى مفيش اولياء صالحين على قيد الحياة فى مصر ... طبعا فيه واكيد كتير 
يعنى الناس دى ربنا يرضى عنها مش قادريين يدعوا الله الولى القادر المجيب فى لحظة اجابة انه يحول جبال البحر الاحمر الى مصبات سيول ويكون عندنا بحيرة جديدة وسد جديد ومروج وانهار وبناقص منه سد النهضة على النيل الازرق ودعوت المولى عز وجل اننا نصبح بلد مصدر للأمطار والسيول يبقى عندنا ميتنا ومنحتش حلة مية او حلتين من اثيوبيا والسودان 
ويا سلام يا سلام لو السودان فاقت لنفسها وقررت تبنى سدود علشان تحافظ على ميتها ... قشطة قشطة صحيح 

ان الله لا يغير ما بقوم حتى يغيروا 
طبعا لما ماء النيل يقل .. وليه ماء النيل امُال بحيرة ناصر دى شغلتها ايه مش بتحوش الماء 
بحيرة ناصر يا كرتونة (مواطن) انت وهو طولها 150 كيلو متر.
مساحة البحيرة حوالي 5250 كيلومتر مربع.
متوسط عرض البحيرة 12 كيلو متر.
أقصى عرض للبحيرة 35 كيلومتر وهو بالقرب من مدار السرطان.
سعة التخزين الكلية 162 مليار متر مكعب.
سعة التخزين الميت 32 مليار متر مكعب.
عمقها 180 متر 
كمل قراءة معايا من فضلك فى ويكبيديا 

بحيرة السد العالي لها سعة تخزينية ضخمة جدا تصل إلى164 مليار متر مكعب من المياه وتستطيع استيعاب الفيضان بالكامل لمدة سنتين وتنقسم سعة البحيرة إلى ثلاثة أقسام الأول ويقع أسفل البحيرة وهو مخصص للتخزين الميت وتصل سعته التخزينية إلى 31 مليار متر مكعب من الطمي وهو يستوعب الطمي القادم مع الفيضان لمدة 500 عام بدون التأثير علي السعة التخزينية لمياه الفيضان، ثم تلي ذلك التخزين الحي لكميات كبيرة من الفيضان.

ويتم صرف كميات من المياه من بحيرة السد العالي حسب الاحتياجات المائية لجميع الأغراض، والتي تبلغ ذروتها خلال زراعة الأرز، حيث تبلغ كمية المنصرف من المياه خلال هذه الفترة 240مليون متر مكعب يوميا، بينما تصل كميات المنصرف من المياه خلال موسم أقل الاحتياجات المائية خلال شهر ديسمبر ويناير إلى نحو 80مليون متر مكعب يوميا، وتستقبل مصر مياه الفيضان من الهضبتين الإثيوبية والاستوائية ولديها شبكة رصد جيدة تمتد علي طول مجري النهر خاصة بعد زيادة معدلات التعاون مع باقي دول حوض النيل، بالإضافة إلى الاستعانة بصور الأقمار الصناعية أو ما يرصد من خلال هيئة الأرصاد العالمية، وتستطيع مصر من خلال شبكات الرصد التنبؤ بالفيضان ووضع السيناريوهات المختلفة للتعامل معه، رغم أنه لا يمكن لأحد أن يجزم بذلك، لأن الظواهر الطبيعية تجعل التنبؤ بالفيضان أمرا صعبا جدا، والواقع يؤكد أنه ليست هناك أي خطورة من أي فيضان أو أي حجم للفيضان في ظل وجود السد العالي

الدكتور شراقى خبير المياه فى مركز الدراسات الافريقية صرح فى اوائل سبتمبر 2019 

ان منسوب المياه في بحيرة ناصر مرتفع والمخزون مطمئن والإيراد متوقع أن يكون جيدا هذا العام، خاصة ونحن نستقبل الفيضان منذ شهر ونصف، مع استعداد بحيرة ناصر لاستقبال الفيضان، رغم أننا تقريبا فى نهاية الفيضان مع وصول المياه إلى مفيض توشكى.

يا جماعة حصل فيضان فى شمال السودان وتوقع دكتور شراقى وصول 20 مليار متر مكعب مع اننا فى نهاية موسم الفيضان 
الكلام اللى بيتقال عن السد ومش السد والخراب اللى حيحل مصر وشرب كراتين (مواطنين) مصر لأبوالهم والمرضعات لألبانهم مش مقتنع بيه ... اقرا حضرتك كده الموضوع ده 

https://www.elwatannews.com/news/details/3291307

انخفاض المياه امام السد العالى  1سم يعنى صرف 60 مليون متر مكعب من المياه يعن مليار متر مكعب = 16.6 سم 
طيب ارتفاع المياه خلف السد حاليا كام ؟؟؟ 
واحنا بنستهلك كل سنة أد ايه؟؟ 

فى اغسطس  2018 كانت كمية المياه خلف السد 192 مليار متر مكعب 
اخرون يؤكدون فى 2018 أن المخزون فى بحيرة ناصر يكفى مصر لمدة 15 سنة قادمة وفقا لكلام الخبراء 
وان منسوب المياه ارتفاعه 177.5 متر فى 2018 وفقا لصور القمر الصناعى الامريكى جايسون 2 وده قمر صناعى شغلته تسجيل مناسيب البحيرات حول العالم 

وفى 17 سبتمبر عام 2019 بلغ ارتفاع المنسوب 178.2 متر 
أللــــــــــــــــــــــــــه ... طب فين المشكلة لو اثيوبيا ملأت السد خلال 3 سنوات !!!!!  
تعالى شوف المقابل استهلاكك كام 114 مليار سنوى منها 80 مليار للشرب والاصل انه بيجيلك 55.5 مليار حصتك سنوى 
يا جماعة بالله عليكم بتجيبوا أم الارقام دى منين مع وجود رقم (فى شكل معلومة ) اننا دخلنا فى مرحلة الفقر المائى من 3 سنين 
لا خد معلومة تانية فى اول 2019 كنا نستهلك مياه اجمالى حوالى 80 مليار مش 114 مليار 

تضارب شديد ولا نهائى فى المعلومات والبيانات 
ندخل على موقع وزارة الرى 
https://www.mwri.gov.eg/

لو حد وصل لحاجة يبل الصفحة ويخزن مايتها ربما يعوزها بعدين 
مفيش معلومات حقيقية من أصله .. لخبطة السنين علشان احنا كراتين نعيش فى جلباب الجهل 
السنين الاخيرة معدل المياه فى السد العالى ارتفع وسببه ان مصر تققل من استخدام المياه مش لان الدنيا ناشفة ودخلنا الشح المائى شُح عليكم وعلى اللى يعرفكم 

القصة كلها كدب x كدب وتلفيق مصطنع للضغط على الشعب المصرى علشان مجموعة حلول 

1. سبوبة العيش الخاصة بمعالجة مياه الصرف وادفع يا مواطن وحيطلع عينك 
2. تدخل اسرائيل للضغط على اثيوبيا وتوافق اثيوبيا مقابل ان سحارات المياه تحت قناة السويس تشتغل وتوصل المياه لاسرائيل وهو المطلوب اثباته 

الموضوع ابسط بكتير مما يمكن تصوره .. الدولة المصرية من ايام مبارك موقعة على اتفاقيات تحفظ أمن اسرائيل .. العالم كله متفق على حفظ امن اسرائيل .. ومفيش شجيع سيما يقدر يطلع يقولهم يا جماعة احنا حنمد مياه النيل لاسرائيل والا الكراتيبن حترف تشجع عينه وعين اللى جابوه فالدنيا تمشى والسبوبة تمشى والكل يتراضى الا الشعب المصرى 

افترضنا كدبتهم مشت ومفيش مياه .. معالجة وتحلية وماله يا خويا حلى مياة البحر حتى لو كلفتك ترليون مفيش مشاكل بس اياك تحمل الشعب قرش واحد زى ما اتحمل ترليونات على بناء مدن جديدة يسكنها الاغنياء بتكلفة على المواطن ,, وثمن البيع منعرفش بيروح فين ؟؟؟؟

دعم يا خويا مشاريع التحلية والتكرير وتتحملها الدولة واحذر ان تمس قيمة متر المياه المكعب بالفاتورة والا حتلاقوا ابوال مصر كلها على ابوها فى امعاكم دون تكرير 

كلام فى الاقتصاد

فى تسعينات القرن الماضى الواحد بعد ما اتخرج من الجامعة والدراسات العالية جدا ومفيش شغل كان يوماتى يجيب الجورنال ويطالع اولا الوظايف الخالية .. ومع الفراغ يفلى الجورنال خبر خبر وكان دايما يجيلك احساس ان كل حاجة فى البلد عال العال وكأنها مصر كلها بتشرب شاى البراد الأزرق 

ده فى الجورنال .. منح تدريبية ووظائف ومشتريات اسلحة وصادرات لا نهائية ... يووووووه 

كنت تقرا ولا كأن مصر اصبحت ولا اطلانس المفقودة وانك عايش فى نعيم ما بعده نعيم 

لكن الواقع الحياتى كان حاجة مختلفة تماما وكان حال البلد احسن من دلوقتى فى كل شئ 

فى نهاية عام 1998 حصل فى البلد خراب ما بعده خراب ... خراب اقتصادى مفيش سيولة وفيه كساد والدنيا بايظة والاقتصاد بيغنى ظلموه 

وكان الكلام فى التسعينات ان الجنيه غرق من كتر التعويم يمكن كان الدولار = 2.5 جنيه مثلا 

وكان رأى النظام السياسى المصرى انه مفيش حل فى ايديهم للأزمة الاقتصادية الموجودة وربنا يحلها من عنده 

وايم الله كان رأى رئيس الدولة انه ربنا يحلها من عنده 

وبمرور السنين كان فيه سخط من شباب البلد على رئيس الدولة والحكومة ... وكان فيه معرضين اكتر من دلوقتى 

النظام السياسى اللى ميحققش طموحات شعبه ملوش أى لزمة 

المجتمع كان ناس فوق الخمسين ودول الحال بالنسبة لهم تمام لكن الشباب كان ضايع والسخط كان من الشباب واحددهم فى شباب الخريجين الجامعيين ايامها لا كان فيه انترنت بالتوسع ده ولا حتى تعرف يعنى ايه تكتك 

لما السيد الرئيس محمد حسنى مبارك تولى رئاسة الجمهورية بعد اغتيال الرئيس محمد أنور السادات كان الواحد صغير وكنت احب اشترى الجورنال كل يوم واقرا فيه لانى كنت فى الصحافة المدرسية وكانوا الكبار بيقولوا ده حيظبط البلد لانه بقاله 6 سنين فى منصب نائب الرئيس ودارس كل الملفات يعنى عارف البلد كويس ومشاكلها 

وبصراحة بابا حسنى مكدبش خبر انا فاكر فى الثمانينات كان فيه مؤتمر اقتصادى مع الفرق عن المؤتمر اقتصادى اللى عمله الرئيس السيسى ... السيسى دعى الدول وقالهم : ها مين جاى مين حيدى البلد اى فلوس .. فكر غريب وعجيب 

اما مؤتمر مبارك فكان دكاترة اقتصاد وضعوا خطط للنهوض بالاقتصاد المصرى وحل مشاكله خلال خطة من الف يوم لتحرير الاقتصاد المصرى وربنا كرم مصر بالدكتور الراحل / عاطف صدقى كرئيس للوزراء 

بصراحة بعد 23 يوليو 1952 ربنا كرم مصر ياثنين ملهموش ثالث الدكتور عاطف صدقى والفريق سعد الدين الشاذلى 

والله عليه العوض فى الاثنين دول واحد بطل حرب اكتوبر 1973 والثانى بطل العبور الاقتصادى فى الثمانينات رغم ان الدكتور عاطف صدقى لم يكن دكتور فى الاقتصاد لكن نفذ الروشتة الاقتصادية بنجاح باهر وكان حصان شغل مش زى رئيس الوزراء محلب اللى كان قاعد طول النهار فى الشارع ولا ليه فى التخطيط ولا البطيخ 
وطبعا رئيس وزراء مصر الحالى انا معرفهوش لانه موظف درجة خامسة بتاع ارشيف

الله يرحم الاثنين الدكتور والفريق 

الدكتور صدقى معومش الجنيه عمال على بطال وبدل من 8.70 جنيه للدولار خلاه 18 جنيه .. لا لا لا لا 

انا عايز الم الدولارات لخزينة الدولة 

كان سعر الفائدة على الدولار 6% تقريبا فتم رفع الفائدة على الجنيه المصرى لتكون 18% .. يا لهوى 

يعنى اللى معاه الف دولار وبيكسب عليها 60 دولار فى السنة يعنى 3000 جنيه تحقق ربح 180 جنيه على اساس سعر 3ج للولار 

لكن لما يحولها الى جنيهات مصرية 3000 جنيه تحقق عائد 540 جنيه سنويا 

طبعا المصريين هجموا وغيروا الدولارات لان المكسب على الجنيه المصرى كان اكتر ليهم 

بغض النظر عن كون هذه السياسة صحيحة او يشوبها عيوب لكنها كانت طريقة لجذب دولارات المصريين مش افرم الجنيه وادبحه واخليه 18 جنيه مع ان سعره فى السوق السوداء كان 12.25 جنيه يعنى بدل 12 اخليه 18 ج  ايه العبط ده 

والله الجنيه عمره ما حيرجع تانى ويمسك نفسه 

فيلم الرجل الثانى : رشدى اباظة مشغل سامية جمال فى الكباريه مع السياح يلعبوا روليت (قمار) وبيبدلوا الدولار بسعر افضل من سعر البنك الجنيه عند رشدى اباظة = 2.5 دولار ... يا خراشى يعنى قيمة الدولار 40 قرش ياخراشى يعنى جنيه زمان يعنى جنيه زمان = 40 جنيه من بتوع دلوقتى ... وفقا لاسعار صرف العملات 

ايام الملك فاروق فى الاربعينات كان سعر الجنيه = 4.1 دولار يعنى الدولار مش محصل 25 قرش 

وفى عهد كباريه رشدى اباظة = 2.5 دولار  وفى 1981 مع اول ايام مبارك كان الجنيه =1.25 دولار وعلى اخر ايامه كان وصل الدولار لسعر 6 جنيه 

لو حبيت تحسب فرق اسعار صرف العملات لنحديد مستوى المعيشة مش حتعرف تعملها بسعر الصرف 

لانه اذا قلنا ايام كباريهات الخمسينات والستينات الجنيه = 2.5 دولار يعنى جنيه امبارح يساوى 40 جنيه من دلوقتى تبقى الحسبة غلط ... ليه ..موظف راتبه 6 جنيه وعايش تمام التمام = 240 جنيه دلوقتى ..... مستحيل 

اقولك على حاجة سعر الجريدة فى النصف الاول من الثمانينات كان قرشين النهارده كام جنيه يعنى 50 ضعف 

ولا اللحمة اللى كانت بسبعين قرشا فى السبعينات مثلا تبقى 140 جنيه يعنى 2000 مرة 

التضخم وما ادراك ما التضخم العدو الاقتصادى الأول للفقراء 

والتضخم العالى يعنى فشلك فى الانتاج وارتفاع سعر الصرف يعنى فشلك فى التصدير وتوسعك فى الاستيراد 

انا أكاد أجزم اننا فى مصر بعد عاطف صدقى معندناش حاجة اسمها اقتصاد بقرش 

دور الدولة انها تنتج وعلشان تنتج لازم يكون عندك ادوات انتاجية رأسمالية يعنى ماكينات تصنيع وماكينات خراطة وورش ومصانع انتاج ادوات رأسمالية يعنى انتج جرارات وانتج الماكينات اللى تحتاجها المصانع .. المواتير والعدد وكل ما له علاقة بالانتاج الرأسمالى .... ساعتها تبقى دولة صناعية ... الحديد والاسمنت والسيراميك دى صناعات ملوثة للبيئة والدول الغربية ضحكت على دول العالم الثالث وتنازلت لها عن تلك الصناعات الملوثة للبيئة والعالم الثالث الأهبل فرح وقطط واعتبره انجاز 

معذرة هذا ما درسناه وتعلمناه فى الاقتصاد رغم كون الحديد والاسمنت سلع استراتيجية لا تقل اهمية عن القمح والسكر والزيوت 

يمكن السبب فى الكتابة فكرة واحدة لم اقترب اليها ولكنى سأذكرها صراحة 

لما كان الدكتور عاطف صدقى بيؤسس لمصر بنية تحتية حقيقية بالكامل لم يسبقه اليها اى وزارة من قبله او بعده (بعد 1952) مصر استدانت المليارات وكان ساعتها الرقم بيقترب من 30 مليار كحجم دين خارجى 

قالولنا جيل الشباب الحالى هو اللى حيتحمل تكلفة هذه الديون لانه بعد تحقيق النجاح والبدء فى سد الديون حيكون عمركم راح ومعلش فرصة تانية بس نوعدكم ان اولادكم لو عرفتم تخلفوهم حيعيشوا فى رخاء والدنيا حتزهزه مع الاجيال الجديدة وتبقى 100 فل وعشرة

والان بعد كل هذه السنين والوضع الاقتصادى الحالى انا شايف ان احفادى حيشوفوا ايام سوداء وان عصر الرخاء الموعود تحفة شيطانية قدمها زعماء العالم الثالث للعُبط شعوب العالم الثالث 

بصراحة انا مش زعلان ان العمر راح هدر .. احتمال ان الدكتور عبد العاطى يرجع تانى ويعملنا جهاز يدخل الازمة الاقتصادية فى الجهاز يطلع منه رخاء يقدمه لجماهير الشعب المصرى يتغذوا عليه ويكون قمة الاعجاز الحلنجى فى القرن 21 للميلاد

كل شئ انكشف انه بان

عامل مشترك واحد فقط بين مسرحية ريا وسكينه مع فيلم شفيقة ومتولى 

مشهد شهير بين الفنان الراحل عبد المنعم مدبولى رحمه الله وبين الممثل احمد بدير 

مشهد العبيط اللى بيتهته الامباشى عبد العال وكل شئ انكشف انه بان 

أما عن فيلم شفيقة ومتولى وهو الفيلم العظيم الذى كان يحمل وسيظل يقدم فى كل مرة تشاهده رسالة جديدة وانعكاس لواقع موجود ... اغنية بانوا بانوا على اصلكوا بانو 

وكأن الأغنية تعبير عن شخصيات ظهرت وتظهر وستظهر بالمجتمع المصرى على مستوى السلطة السياسية وفى المجال الاقتصادى والحياتى والمجتمعى

وانى اذ استمع الى الاغنية تلك المرة فكأنى أراها شفيقة هى مصر التى كانت وما زالت وستظل ترضخ لحياة تعيسة شاقة وان بدت عاهرة لكنها تظل مغلوبة على امرها 

من فيلم شفيقة ومتولى تحتار وانت بتسأل مين اللى غوا شفيقة ؟؟؟؟؟؟

1- ابن العمده اللى عشقها وعشقته وانحطت معه الى حضيض الاخلاق

2- الفقر المقدع والاحتياج 

3- الوحدة والانكسار وغياب من يتحمل عبئ حياتها الشاقة 

4- عصر السخرة المفروض على الرجال وجبر النساء على الاحتياج 

مين اللى غواكى يا مصر 

الشيطان 

ولا ابن العمدة 

ولا الفقر والسخرة 

ولا هى ناسك اللى على خاطرك داست 

وبعيدا عن اى تحليل سياسى للفيلم وان كان يستحق التحليل لمعانى انسانية وسياسية واجتماعية لا حصر لها 

لكن يكفى عرض الاغنية والجواب فعلا بيبان من عنوانه 

بانو بانو بانو .. على اصلكم بانو

والساهى يبطل سهيانه

ولا غنى ولا صيت .. دوله جنس غويط

وكتاب ما يبان من عنوانه

بانو .. ايوه بانو

جربنا الحلو المتعايق ابو دم خفيف

وبقينا معاه اخوه شقايق فاكرينه شريف

اتاريه مش كده على طول الخط

الطبع الردى من جواه نط

خلاص بقى مهما انشال وانحط .. مافيش دمعة حزن علشانه

بانو .. ايوه بانو

وعرفنا سيد الرجاله .. عين الاعيان

من باره شهامه واصاله تشوفه تقول اعظم انسان

انما من جوه يا عينى عليه .. بياع ويبيع حتى والديه

واهو ده اللى اتعلمنا على ايديه .. القهر وقوه غليانه

بانو .. ايوه بانو

دوروا وشكوا عنى شويه كفايانى وشوش

ده أكم من وش غدر بيا ولا ينكسفوش

وعصير العنب العنابى العنابى

نقطه ورا نقطه يا عذابى يا عذابى

يكشفلى حبايبى وأصحابى.. يوحدنى وانا فى عز شبابى

القلب على الحب يشابى والحب بعيد عن اوطانه

بانوا .. ايوه بانوا

أهو كدا بانوا على أصلكوا بانوا

كلام فى الاقتصاد - مجنونة يا حمرا

بعد ان عرفنا مأساة الشيدر نشوف المجنونة يا قوطة 

المحدد الرئيسى للسعر هو قانون العرض والطلب 

بتنتج كام قفص طماطم وتعرضهم للبيع والسوق محتاج كام قفص 

نفرض ان الفلاح عرض للبيع 20 قفص طماطم نقول 500 كجم بسعر 2 جنيه للكيلو ولما وصلوا السوق تم عرضهم والناس اقبلت للشراء فلاحظ البائع ان الناس كتير حوالى 200 فرد وكل واحد بيشترى 1.5 كجم فى المتوسط  ومصانع الصاصة محتاجة 100 كجم يوميا يعنى المطلوب كله 400 كيلو ... على اخر النهار يلاقى عنده 100 كجم متبقى غير مباع فيغير التسعيرة يخليها 1.75 جنيها علشان يبيع اللى فاضل ويلم فرشته ويروح هنا العرض اكتر من الطلب مش كل الناس عايزة طماطم فالسعر ينزل لان الانتاج فايض 

أو انه يحاول لعبة التصدير لتصدير الفائض وقع تحت ايده كام مواطن ليبى فعرض عليهم الطماطم المصرى الممتازة وانهم لو اشتروها وباعوها فى ليبيا حياكلوا من وراها الشهد ولو كان أمين حيبيع الكمية الباقية 100 كيلو بسعر البيع العادى 2ج للكيلو بدون خسائر وكده الدنيا وازنت نفسها 

افترضنا ان الطبيعى اصبح 2 كجم استهلاك يومى للأسرة من الطماطم وطلب السكان على الطماطم ثابت وعدد السكان ثابت يبقى بعرض كل يوم 500 كيلو .. 400 للطلب المحلى  و100 كيلو تصدير 

حصل تغيير على الوضع الطبيعى الجماعة الليبين لقوا نفسهم تربحوا بشكل كبير من الطماطم نتيجة للظروف السياسية والاقتصادية الهباب فى ليبيا فجالك وقالك انا عايز 300 كيلو مش 100 كيلو وبأى سعر فحضرتك قلتله طيب حبيعلك الكيلو ب 3 جنيه قالك موافق 

تانى يوم حضرتك جالك 500 ك مطلوب 400 للطلب المحلى و300 للتصدير .. بعت 300 للتصدير بسعر 3 ج للكيلو وتبقى عندك 200 كيلو فقط للطلب المحلى يعنى نصف المطلوب بسعر 2 جنيه 

الناس يا عينى مزحومة على الطماطم وشايفين انها مش حتكفيهم كلهم بسعر 2 جنيه وحصل اللى حصل ومش كله اتراضى 

تانى يوم نفس الحكاية لكن فيه ناس جايين مستقتلين على الطماطم ولو ب 2.5 ولما التاجر سمع الكلمة زقطط ورفع السعر ل2.5 ج واللى مش عاجبه يرحل لان المستهلك مستعد يدفع 2.5 ج مقابل انه ياخدها واستقر السعر على 2.5 ج وبدأت الناس تقلل استهلاكها من الطماطم وزيادة استهلاكها من الصلصة لتعويض النقص فى الطلب

التاجر لما بيروح كل يوم بالنسبة له الدنيا متظبطة لكن ابليس مش سايبه فى حالة .... جزمة الليبى انظف من دماغ المصرى بيدفعلك 3 جنيه فى الكيلو والمصرى بيدفع 2.5 ج ومش عاجبه العدل ايا شيخ بندر التجار انك توحد السعر كله لـ 3 جنيه جوا وبرا .. ده صاحب بالين كداب يا عم الحاج وانت وعيالك اولى بالفرق 

طول الليل والتاجر بيفكر فى موضوع توحيد السعر بره وجوه 

ولغاية ما التاجر يقرر ممكن نقول لنفسنا الموضوع بسيط نزود انتاج الطماطم ليصبح 700 كيلو علشان كل ده يتلغى بتساوى الطلب الداخلى والخارجى عند 700 كيلو عند السعر الطبيعى 2 جنيه للكيلو 

لأ شاطر يا باشا ياللى بتفكر .. هو الفلاح حيضرب ايده فى الرمل يطلع طماطم 

الفلاح لازم يعمل حسابه يشترى فدان زيادة ويجيب بذور وعمالة ويشتغل ليرفع الانتاج من 500 الى 700 كيلو يوميا وعليك بخير ده حيكون الموسم الجاى يعنى من 6 شهور الى سنة 

يعنى يظل الوضع على حاله وعلى المتضرر اللجوء الى الصلصة السلعة البديلة 

نخش على مصنع الصلصة اللى بيبيع برطمان الصلصة ب 5 جنيه عند سعر 2 جنيه لكيلو الطمام ... طبعا المصنع عنده مخزون انتاج وفى لحظة بدأ المخزون يقل لان الطماطم سعرها ارتفع الى 2.5 واستهلاك الناس من الصاصة زاد 

وفى كل الاحوال لازم المصنع يستمر فى انتاج الصلصة فلما جه يشترى طماطم لقاها 2.5 جنيه للكيلو مش بـ 2 جنيه وفى نفس الوقت لازم يزود انتاجه عن الطبيعى لان الطلب على الصلصة زاد فيدخل السوق يشترى ب 2.5 جنيه وبدل ما كان بيشترى 100 كيلو يوميا دلوقتى عايز 200 كيلو يوميا 

فالطلب على الطماطم زاد بدل ال700 كيلو بقوا 800 كيلو يوميا والحكاية باظت خالص

طبعا انتاج الصلصة الجديدة البرطمان مش ب 5 جنيه نقول مثلا 7 جنيه فالراجل المستهلك خلاص حيكفر ويطلع من هدومه الطماطم غلت والصلصة غلت فيقوم يهج من البلد وده عين ما تريده السلطة السياسية للبلاد ان الشعب يخف دول 100 مليون يا حاج 

تاجر الطماطم لقى الدنيا اخر حلاوة مطلوب طماطم فى كل حتة وجاله الليبى يشترى ب 3 ج قاله حاسب يا شقيق ... الاخوة فى دبى سمعوا عن حلاوة الطماطم المصرى وعايزين يدفعوا 5 جنيه للكيلو .. يا خراشى 
تنتهى الحكاية ان التاجر يقول للكل يلا يا ولاد الوزة الطماطم ب 5 جنيه واللى مش عاجبه تبقى حمرا
ويصبح سعر الطماطم 5 جنيه عند انتاج 500 كيلو يوميا 
كل ده والدنيا زى ما هى لا انتاج زاد ولا سعر صرف العملة اتغير كله فى الثبات 
وتخيل سعادتك على الوضع ده ومحصول الطماطم اتحرق من موجة حارة او موجة بارده والانتاج وصل الى 400 او 300 او 200 او 100 كيلو يوميا اكيد سعر الطماطم حيوصل 10 جنيه وده حصل وسيظل يحصل عندنا فى مصر 

ولنا عودة مرة اخرى مع الطماطم لانه متبقى افتراضات لا نهائية أهمها

1. ايه اللى بيحصل لما العرض يزيد نتيجة منع التصدير 
2. ايه اللى بيحصل مع تغير سعر الصرف 
3. ايه اللى بيحصل لما عدد السكان يزيد
4. ايه اللى بيحصل فى موسم الزراعة القادم مع الرغبة فى زيادة الانتاج 
5. ايه اللى بيحصل لما الدولة بتكون نايمة على ودانها وكل ده بيحصل من حواليها 

وعلى رأى حكيم الغير حكيم

وايه اللى بيحصل ده .. ايه اللى انا شايفه ده