طالعتنا صحيفة الوطن بخبر قيام محافظ الاسكندرية بشراء سيارات بقيمة 2.5 مليون جنيه
والناس زعلانة ويقولك الاسعار ومش لاقيين ناكل ... هى فلوس ابوكم يا شعب
انتم عارفين ان الفلوس الاميرية بيحميها القانون اللى بتطبق نصوصه مع حركة نغمات اغنية صباح ساعات ساعات
يعنى القانون ده حطوه رجال المخابرات واصحاب النفوذ وليس اعضاء المجلس الموقر مجلس الشعب المأسوف على شبابه
حطوه علشان يضمنوا الحفاظ على المصالح المتغيرة بتغيير ظروف كل مرحلة
عامة المال العام مال ملوش صاحب لكن عنده استقلال كبير وحصانة فوق القانون فلا يتم الرقابة عليه او التنصت عليه ومتابعة تنقلاته من جانب الاجهزة الامنية او الرقابية
فالراجل المحترم الذكى ابو الفكاكة محافظ الاسكندرية قالك فيه 2.5 مليون ودى المبالغ المتبقية في بند وسائل الانتقال بخطة المحافظة لعام 2014/2015 يعنى لو لم يتم استخدامها ممكن تفسد وتعفن وريحتها تطلع فالفاسدين آكلاين الُحت يتلموا عليها ينهشوها فكان البديل استخدام المبلغ المخصص لشراء سيارات تم شراؤها فى العلن وليست تريبتك أو سبق تقطيعها وتهريبها
فالأولى ايه يا جماعة نسيب الفلوس تتنهب وتضيع ولا نشترى بيها حاجة مفيدة مينفعش تتسرق وتتنهب
فمن هذا المنطلق قام المحافظ بمخاطبة رئيس الوزراء المهندس ابراهيم محلب ووزير التخطيط - مش مهم نعرف اسمه- والناس وافقت
فبدل ما نشكر الراجل لمحافظته على المال العام نزعل ونضايق ونزمزق
وعليه اطالب السيد الرئيس المصرى بتحويل اصول مصر الى اشياء منقولة لا يمكن سرقتها وينصح بتكرار تجربة المحافظ الهُمام هانى المسيرى فى كافة المحافظات والوزارات والهيئات العامة
وبلاش والنبى نشترى اوناش لانه حتى تاريخه لم يتم العثور على ونش مترو الانفاق العملاق جدا المسروق فى عز النهار فى اواخر ثمانينيات القرن العشرين
وينصح مواطنون بشراء مجموعة من الاهرامات الصغيرة لصعوبة تفكيكها أو هدمها او استخدامها كسكن خاص لكبار موظفى الدولة
ليست هناك تعليقات:
إرسال تعليق